19 yanvar 2026-cı il tarixində Astara şəhəri Mirzə Ələkbər Sabir adına 1 nömrəli tam orta ümumtəhsil məktəbində 20 Yanvar faciəsinin 36-cı ildönümü ilə əlaqədar “20 Yanvar – Qanlı Tarix, Unudulmaz Xatirə” adlı anım tədbiri təşkil olunub.
"Tehsil365" xəbər verir ki, Tədbirdə məktəbin direktoru Rəna Məmmədova iştirak edib. Anım tədbiri Azərbaycan dili və ədəbiyyat müəllimi Gülayə Babazadə tərəfindən təşkil olunub.
Keçirilən tədbirin əsas məqsədi şagirdlərdə vətənpərvərlik hisslərinin aşılanması, 20 Yanvar hadisələrinin tarixi əhəmiyyətinin dərindən dərk etdirilməsi, eyni zamanda şagirdlərin yaradıcılıq bacarıqlarının üzə çıxarılması olub.
Müxtəlif siniflərdən olan şagirdlər çıxışlarında 20 Yanvar faciəsinin ağrılı və unudulmaz anlarını, şəhidlərimizin qəhrəmanlığını, Azərbaycan bayrağını, əbədi məşəli və xalqımızın mübarizə ruhunu şeirlər, təqdimatlar və bədii kompozisiyalar vasitəsilə əks etdiriblər.
Anım tədbiri şagirdlərin milli-mənəvi dəyərlərə bağlılığının möhkəmləndirilməsində, həmçinin 20 Yanvar şəhidlərinin əziz xatirəsinin yad edilməsində mühüm əhəmiyyət daşıyıb.