"Nvidia"nın baş icraçı direktoru Censen Huan inkişaf etmiş süni intellekt (Al) ətrafında gedən müzakirələrə toxunaraq, ictimaiyyətdə zaman-zaman səsləndirilən "tanrı səviyyəsində süni intellekt” ideyasının mövcud texnologiyalarla mümkün olmadığını deyib.
“Tehsil365” Qaynarinfo-ya istinadən xəbər verir ki, Huanın fikrincə, bu gün heç bir tədqiqatçı insan dilini, molekulyar strukturları, zülal ardıcıllıqlarını və ya fizikanı tam şəkildə anlayan, bütün sahələrdə mükəmməl səriştəyə malik bir süni intellekt sistemi yarada biləcək vəziyyətdə deyil. Belə bir sistemin mövcud texnologiyadan xeyli uzaqda olduğunu vurğulayan Huan yaxın gələcəkdə ortaya çıxacağına dair iddiaları da real hesab etmədiyini bildirib.
Şişirdilmiş süni intellekt qorxusu sektora ziyan vurur
Censen Huan xüsusilə sosial mediada və bəzi şərhçilər arasında yayılan "qiyamət ssenariləri”ni tənqid edib. Süni intellektin bəşəriyyət üçün ekzistensial təhlükə olduğu yönündəki fikirlərin həm texnologiya sektoruna, həm də cəmiyyətə ciddi zərər verdiyini qeyd edib.
"Heç bir tədqiqatçının tanrı səviyyəsində süni intellekt yarada biləcək məntiqli bir potensialı yoxdur. Belə bir süni intellekt artıq mövcud deyil", deyə Huan bildirib.
Onun sözlərinə görə, süni intellekti elmi-fantastik narrativlərlə əlaqələndirmək hökumətlərin, işçilərin və şirkətlərin real problemlərə həll tapmasına töhfə vermir.
Diqqət mərkəzi: Praktik və faydalı tətbiqlər
"Nvidia” rəhbərinə görə, əsas diqqət süni intellektin konkret və faydalı istifadə sahələrinə yönəlməlidir. Huan bildirib ki, AI insan məhsuldarlığını artıran bir vasitə kimi dəyərləndirilməli, qorxu əsaslı yanaşmalar əvəzinə real gözləntilər formalaşdırılmalıdır.
Bu çərçivədə süni intellekt və robotların işçi çatışmazlığı yaşanan sahələrdə dəstəkləyici rol oynaya biləcəyini deyən Huan bu sistemləri "AI miqrantları” kimi xarakterizə edib. Onun fikrincə, süni intellekt insanın yerini tutmaq yox, mövcud işçi qüvvəsini tamamlayan və səmərəliliyi artıran köməkçi rolunu oynayır.
Təsiri məhdud, gözləntilər isə yüksəkdir
Digər tərəfdən, Stenford Universiteti və "Fortune” tərəfindən yayımlanan hesabatlar süni intellektin son illərdə iş elanlarına təsirinin məhdud olduğunu göstərir. Hesabatlarda bir çox AI alətinin şirkətlərin əməliyyat proseslərində və ya maliyyə göstəricilərində ölçülə bilən ciddi fərq yaratmadığı da qeyd olunur.
Huan "tanrı səviyyəsində” vahid və mərkəzləşdirilmiş süni intellekt ideyasına şəxsi olaraq da qarşı olduğunu bildirib. Belə bir sistemin bir şirkətin, ölkənin və ya qurumun nəzarətində olmasını "son dərəcə faydasız” adlandıran "Nvidia” rəhbəri, sektorun bu gün insanlara real fayda verən kiçik, lakin mənalı inkişaflara fokuslanmalı olduğunu vurğulayıb.
"Meta” kimi şirkətlər dünya üzrə nüvə enerjisi ilə işləyən iri məlumat mərkəzləri quraraq AI infrastrukturunu genişləndirməyə davam etdiyi bir vaxtda, Huana görə, əsas məsələ məsuliyyətli inkişaf yanaşması və şişirtmədən uzaq, realist gözləntilərdir.