Bu gün Azərbaycan təsviri sənətinin görkəmli nümayəndəsi, realist rəngkarlıq məktəbinin banilərindən biri olan Bəhruz Kəngərlinin anadan olmasından 133 il ötür.
"Tehsil365" xəbər verir ki, Bəhruz (Şamil) Şirəlibəy oğlu Kəngərli 10 (22) yanvar 1892-ci ildə Naxçıvanda dünyaya gəlib. O, Azərbaycan rəngkarlığında ilk akademik rəsm üslubunda çalışan sənətkar kimi tarixə düşüb. Rəssam qısa, lakin məhsuldar yaradıcılıq yolu keçərək milli təsviri sənətdə realizm ənənələrinin formalaşmasına mühüm töhfələr verib.
Kəngərlinin yaradıcılığında portret və məişət janrları xüsusi yer tutur. Onun əsərlərində dövrün sosial reallıqları, insanların daxili aləmi və Naxçıvanın təbiəti böyük ustalıqla əks olunub. “Qaçqınlar” silsiləsi Azərbaycan təsviri sənətində humanist ideyaların güclü ifadəsi kimi qiymətləndirilir.
Gənc yaşlarında ağır xəstəliklə mübarizə aparmasına baxmayaraq, Bəhruz Kəngərli təxminən 2000-ə yaxın rəsm əsəri yaratmağa nail olub. O, 7 fevral 1922-ci ildə, cəmi 30 yaşında Naxçıvanda vəfat edib.
Bu gün Bəhruz Kəngərlinin irsi Azərbaycan milli mədəniyyətinin qiymətli nümunəsi kimi muzeylərdə qorunur və sənətsevərlər tərəfindən böyük maraqla öyrənilir. Onun yaradıcılığı gənc rəssamlar üçün hələ də ilham mənbəyi olaraq qalır.