Zaqatala rayon İsgəndər Məmmədov adına Qımır kənd tam orta ümumtəhsil məktəbində ədəbiyyat dərslərinin səmərəliliyinin artırılması məqsədilə kollektiv mütaliənin təşkili istiqamətində “Oxu dəqiqələri” adlı maraqlı fəaliyyət təşkil olunub.
"Tehsil365" xəbər verir ki, Layihə xüsusilə IX sinif şagirdlərini əhatə edib.
“Oxu dəqiqələri” zamanı müxtəlif siniflər üçün seçilmiş bədii ədəbiyyat nümunələri şagirdlər tərəfindən səsləndirilib, dinlənilib və müzakirə olunub. Bu fəaliyyət şagirdlərin oxu bacarıqlarının, bədii zövqünün və nitq mədəniyyətinin inkişafına müsbət təsir göstərib.
Dərs prosesində şagirdlər oxuduqları əsərlər haqqında fikir və təəssüratlarını bölüşüb, əsərlərin ideya-məzmun xüsusiyyətlərini müzakirə ediblər. Müşahidələr göstərib ki, kollektiv mütaliə şagirdlərdə kitaba marağı artırır və onları fəal oxucuya çevirir.
Məktəb rəhbərliyi və müəllimlər bu cür maarifləndirici və tərbiyəvi tədbirlərin gələcəkdə də davam etdiriləcəyini bildiriblər. “Oxu dəqiqələri” layihəsi şagirdlərin dünyagörüşünün genişlənməsində və mütaliə vərdişlərinin formalaşmasında mühüm rol oynayır.