Tanınmış kinorejissor və ssenarist Murad İbrahiməyov milli kinematoqrafiyanın mövcud durumu ilə bağlı narahatlığını ifadə edib. Onun sözlərinə görə, kinematoqrafiya bir xalqın milli özünüdərkini və ölkənin simasını formalaşdıran əsas dəyərlərdən biridir.
"Tehsil365" xəbər verir ki , Müsahibələrinin birində səsləndirdiyi “Kinematoqrafsız millət natamamdır” fikrini yenidən vurğulayan M. İbrahiməyov bildirib ki, Azərbaycan tədricən kino dilində danışmağı bacarmayan bir cəmiyyətə çevrilir. “Bu, ölkə üçün çox pis göstəricidir. Hələ 50 il əvvəl Türkiyə və İrandan kino sahəsində xeyli irəlidə idik. Bu gün isə ciddi geriləmə müşahidə olunur. Halbuki güclü ənənələrimiz və fəaliyyət göstərmək üçün şərait tapmayan istedadlı kinematoqrafçılarımız var”, – deyə o qeyd edib.
Rejissorun sözlərinə görə, hazırda vaxtaşırı parlaq filmlər çəkilsə də, onların sayı çox azdır və bu, ümumi mənzərəni dəyişmir.
Murad İbrahiməyov sovet dövrü kinematoqrafiyasına münasibət məsələsinə də toxunub. O hesab edir ki, Azərbaycan sovet kinematoqrafiyasını tarixin bir küncünə atmaq düzgün yanaşma deyil: “Biz vahid bir ölkənin tərkibində idik və Azərbaycan sovet kinematoqrafiyası bizim milli kinematoqrafımızın bir hissəsidir. Bizə məxsus olanı niyə unutmalıyıq?”
Onun fikrincə, müstəqilliyin mahiyyətini dərk etmək üçün də kinematoqrafiya mühüm rol oynayır: “Kinematoqrafsız bu mümkün deyil. Bu həqiqəti anlamadan atılan addımlar ağır fəsadlara yol aça bilər.”
Murad İbrahiməyovun bu fikirləri milli kino siyasətinin yenidən nəzərdən keçirilməsi və mövcud potensialdan daha səmərəli istifadə olunması məsələsini bir daha gündəmə gətirir.