Böyük Britaniya hökuməti, gənclərin rifahını qorumaq məqsədilə 16 yaşdan kiçiklər üçün sosial medianın istifadəsini qadağan etməyi nəzərdən keçirir.
"Tehsil365" xəbər verir ki, Bu barədə məsləhətləşmələr artıq başlayıb.
Təklif olunan paket çərçivəsində İngiltərənin təhsil müfəttişliyi Ofsted məktəblərə daxil olaraq telefon istifadəsi ilə bağlı siyasətləri yoxlamaq səlahiyyətinə malik olacaq. Nazirlər məktəblərin "standart olaraq telefonsuz" olmasını gözlədiklərini bildiriblər.
Ekspertlər qeyd edirlər ki, bu addım uşaqların psixi sağlamlığını və ümumi rifahını qorumaq məqsədi daşıyır. Dünya miqyasında gənclər üçün ilk sosial media qadağası 2025-ci ilin dekabrında Avstraliyada qüvvəyə minib və bu, digər ölkələr, o cümlədən Böyük Britaniyanı da oxşar addımlar atmağa təşviq edib.
Bəzi uşaq xeyriyyə təşkilatları və ekspertlər bu ideyaya qarşı çıxsa da, digər tərəfdən sosial medianın gənclər üzərində mənfi təsirlərini azaltmaq üçün bu addımı dəstəkləyənlər də var.
Hökumət məsləhətləşmələrin nəticəsinə əsasən, qanunvericilikdə və məktəb siyasətlərində dəyişikliklər etməyi planlaşdırır.