Azərbaycanın Milli Qəhrəmanı, Birinci Qarabağ müharibəsinin şəhidi Hikmət Oqtay oğlu Muradovun xatirəsi xalqımız tərəfindən dərin hörmət və ehtiramla anılır.
"Tehsil365" xəbər verir ki, Hikmət Muradov 23 yanvar 1969-cu ildə Bakıda anadan olub. Gənc yaşlarından vətənpərvər ruhda böyüyən Hikmət Muradov torpaqlarımızın müdafiəsi uğrunda gedən Birinci Qarabağ müharibəsində könüllü olaraq iştirak edib. O, döyüşlər zamanı böyük şücaət və qəhrəmanlıq nümunəsi göstərərək silahdaşları arasında fərqlənib.
Hikmət Oqtay oğlu Muradov 29 oktyabr 1991-ci ildə Dağlıq Qarabağ Muxtar Vilayətinin Xanabad yaşayış məntəqəsi istiqamətində gedən döyüşlərdə qəhrəmancasına şəhid olub. Onun göstərdiyi igidlik və Vətənə sədaqəti Azərbaycan xalqının yaddaşında əbədi həkk olunub.
Azərbaycan Respublikası Prezidentinin müvafiq sərəncamı ilə Hikmət Muradova ölümündən sonra “Azərbaycanın Milli Qəhrəmanı” fəxri adı verilib.
Hikmət Muradovun həyatı və döyüş yolu gənc nəsil üçün vətənpərvərlik, fədakarlıq və qəhrəmanlıq məktəbidir. Onun əziz xatirəsi daim qəlblərdə yaşayacaq.