Bakı Mühəndislik Universitetinin (BMU) təşkilatçılığı ilə aprelin 23-25-də “İnnovativ sintez və funksional materiallar” mövzusunda keçiriləcək beynəlxalq elmi konfransa tezislərin qəbulu davam edir.
Universitetdən “Tehsil365"ə bildirilib ki, kimya, materialşünaslıq və əlaqəli sahələr üzrə aparılan müasir elmi tədqiqatların müzakirəsini təşkil etmək, alimlər və gənc tədqiqatçılar arasında elmi əməkdaşlığı genişləndirmək məqsədi daşıyan konfransa tezislərin qəbulunun martın 15-də başa çatması nəzərdə tutulur.
Tədbirdə müxtəlif ölkələrdən tanınmış alimlər, tədqiqatçılar, sənaye nümayəndələri və gənc mütəxəssislər iştirak edəcəklər. Konfrans çərçivəsində nanotexnologiya, enerji materialları, biomateriallar, polimerlər və hesablama materiallarının sintezi, dizaynı, eləcə də tətbiqi sahəsindəki ən son nailiyyətlər müzakirə olunacaq.
Beynəlxalq konfrans elmi biliklərin mübadiləsi ilə yanaşı, gənc tədqiqatçıların öz elmi işlərini təqdim etməsi, yeni əməkdaşlıq əlaqələrinin qurulması və innovativ ideyaların təşviqi baxımından mühüm platforma rolunu oynayacaq. Elmin istehsalat və sənaye ilə inteqrasiyasına, universitetin elmi-tədqiqat potensialının gücləndirilməsinə, bütövlükdə Azərbaycan elmi mühitinin beynəlxalq səviyyədə tanıdılmasına və innovasiyayönümlü inkişaf strategiyasına mühüm töhfə verəcək konfransın proqramına plenar iclaslar, tematik sessiyalar, məruzələr, poster təqdimatları və elmi müzakirələr daxildir.
Konfrans haqqında daha ətraflı məlumat əldə etmək və digər mühüm tarixlərlə buradan tanış olmaq mümkündür.