“Tehsil365” İnformasiya Agentliyinin layihəsi olan “Şəhidin səsi” proqramının növbəti buraxılışı Vətən uğrunda canından keçmiş qəhrəman şəhid Cavid Qorxmaz oğlu Cabarzadənin əziz xatirəsinə həsr olunacaq.
“Tehsil365" xəbər verir ki, Veriliş 26 yanvar tarixində saat 18:00-da, könüllü müxbir Nərminə Eyyubovanın təqdimatında yayımlanacaq.
Qeyd edək ki, Cavid Cabarzadə 10 avqust 1997-ci ildə Bakı şəhəri, Suraxanı rayonu, Bülbülə qəsəbəsində anadan olub. O, 2003-cü ildə orta məktəbin birinci sinfinə başlayıb və 2014-cü ildə təhsilini başa vurub. Bununla yanaşı, musiqiyə xüsusi marağı olan Cavid tar ixtisası üzrə musiqi məktəbini də bitirib.
Cavid Cabarzadə yalnız incəsənətlə deyil, idmanla da yaxından maraqlanıb. O, qədim idman növlərindən biri olan kamandan oxatma ilə məşğul olub.
2015-ci ildə hərbi xidmətə yollanan Cavid kəşfiyyatçı-snayper ixtisasına yiyələnib. 2016-cı ilin Aprel döyüşləri zamanı Lələtəpə yüksəkliyinin azad olunması uğrunda gedən döyüşlərdə iştirak edib, düşmənin bir neçə canlı qüvvəsini və texnikasını məhv edib. 2017-ci ildə hərbi xidmətini başa vurub.
2020-ci ilin Tovuz döyüşləri zamanı general-mayor Polad Həşimovun şəhid olmasından sonra, Azərbaycanın minlərlə igid oğlu kimi Cavid də ailəsinə xəbər vermədən ordu sıralarına könüllü şəkildə yazılıb.
O, 27 sentyabr 2020-ci ildə başlanan İkinci Qarabağ müharibəsində Azərbaycan Ordusunun əsgəri kimi döyüşlərə qatılıb. Cavid Cabarzadə Cəbrayıl, Füzuli və Xocavənd rayonlarının azad olunması uğrunda gedən döyüşlərdə şücaətlə iştirak edib.
Qəhrəman döyüşçü 24 oktyabr 2020-ci ildə Füzuli–Xocavənd istiqamətində gedən ağır döyüşlərdə qəhrəmancasına şəhid olub. Şəhidimiz 5 noyabr 2020-ci ildə II Fəxri Xiyabanda dəfn edilib.
Cavid Cabarzadə Azərbaycan Respublikasının Prezidenti İlham Əliyevin müvafiq sərəncamları ilə ölümündən sonra:
“Vətən uğrunda” medalı (15.12.2020),
“Füzulinin azad olunmasına görə” medalı (25.12.2020),
döyüşlərdə göstərdiyi şücaətə görə III dərəcəli “Vətənə xidmətə görə” ordeni ilə təltif olunub.
“Şəhidin səsi” proqramının bu buraxılışı Vətən uğrunda canından keçmiş qəhrəman şəhid Cavid Cabarzadənin həyat yoluna, döyüş şücaətinə və unudulmaz xatirəsinə ithaf olunur.