Bakı şəhəri 270 nömrəli tam orta məktəbin X sinif şagirdləri üçün Bakı Dövlət Universitetində (BDU) infosessiya təşkil olunub.
“Tehsil365” xəbər verir ki, infosessiya çərçivəsində şagirdlər BDU-nun Heydər Əliyev, Genetika və təkamül, Faydalı qazıntılar muzeyləri, eləcə də universitetin unikal layihələrindən biri olan “Eko Məkan” ilə yaxından tanış olublar.
Tədbir zamanı şagirdlərə son illər Bakı Dövlət Universitetində aparılan yenidənqurma işləri, tədris prosesində tətbiq olunan innovativ yeniliklər və dəyişikliklər barədə ətraflı məlumat verilib. Eyni zamanda BDU-nun nüfuzlu beynəlxalq reytinqlərdə əldə etdiyi yüksək göstəricilər, tələbələrin yerli və beynəlxalq səviyyədə qazandıqları uğurlar diqqətə çatdırılıb.
Bununla yanaşı, şagirdlər Bakı Dövlət Universiteti ilə xarici ali təhsil müəssisələri arasında imzalanmış əməkdaşlıq memorandumları, ikili diplom proqramları və bu proqramların yaratdığı geniş təhsil imkanları barədə də məlumatlandırılıblar.
