Azərbaycan mətbuat tarixində şücaət və peşə borcuna sədaqətin simvoluna çevrilmiş adlardan biri də jurnalist Salatın Əsgərovadır.
“Tehsil365” xatırlatma edir ki, Salatın Əsgərova “Molodyoj Azerbaydjana” qəzetinin xüsusi müxbiri kimi fəaliyyət göstərib. O, Ermənistan–Azərbaycan münaqişəsinin ən gərgin dövrlərində cəbhə bölgələrindən reportajlar hazırlayaraq baş verən hadisələri operativ və obyektiv şəkildə ictimaiyyətə çatdırıb. Jurnalist fəaliyyəti dövründə daim həqiqətin üzə çıxarılmasını əsas prinsip kimi qəbul edib.
1991-ci il 9 yanvar tarixində Salatın Əsgərova Laçın–Şuşa yolunda xidməti vəzifəsini yerinə yetirərkən erməni silahlı dəstələrinin hücumuna məruz qalaraq qətlə yetirilib. O, Azərbaycanın ilk qadın jurnalist-şəhidi kimi mətbuat tariximizə adını yazdırıb.
Salatın Əsgərovanın həyat və fəaliyyəti bu gün də Azərbaycan jurnalistləri üçün peşəkarlıq, cəsarət və vətənpərvərlik nümunəsi hesab olunur. Onun xatirəsi ölkənin media ictimaiyyəti tərəfindən daim hörmət və ehtiramla yad edilir.