Yanvarın 23-də Bakı Slavyan Universitetində (BSU) rektor Anar Nağıyevin sədrliyi ilə Elmi şuranın növbəti iclası keçirilib.
Bu barədə “Tehsil365”ə universitetdən məlumat verilib. Bildirilib ki, BSU-da əmək nəticələrinə görə ədalətli ödənişi təmin etmək, professor-müəllim heyətinin motivasiyasını artırmaq, bacarıq fərqlərini nəzərə almaq, əmək məhsuldarlığını yüksəltmək və universitetin rəqabət qabiliyyətini artırmaq məqsədilə differensial əmək haqqı sisteminin tətbiqi üzrə qaydalar hazırlanıb.
Qeyd olunub ki, differensial əməkhaqqı sisteminin tətbiqi üç mərhələdən ibarət olacaq. Prosesin birinci mərhələsi professor-müəllim heyəti üçün nəzərdə tutulub və 1 fevral 2026-cı ildən etibarən tətbiq olunmağa başlayacaq.
Bildirilib ki, bu sistemin əsas məqsədi BSU-da professor-müəllim heyətinin fəaliyyətini obyektiv meyarlar əsasında qiymətləndirmək, əməkhaqlarını diferensiallaşdırmaqla onların elmi-pedaqoji fəaliyyətlərinin universitetin inkişaf hədəflərinə uyğun şəkildə stimullaşdırılmasını gücləndirməkdir.
