Yanvarın 24-də Bakı Slavyan Universitetinin (BSU) “İnklüziv təhsildən inklüziv cəmiyyətə” layihəsi çərçivəsində Bank Respublikanın rəsmi müraciətinə əsasən bankın Müştəri xidmətləri departamentinin əməkdaşları üçün “İnklüziv bankçılıq” mövzusunda peşəkar inkişaf təlim proqramı təşkil olunub.
Bu barədə “Tehsil365”ə universitetdən məlumat verilib. Bildirilib ki, təlim proqramının əsas məqsədi bank mühitində inklüzivlik anlayışının mahiyyətini izah etmək, müştəri davranışlarına fərqli baxış bucağından yanaşmanı formalaşdırmaq, eləcə də xidmət proseslərinin insan hüquqlarına əsaslanan, çevik və müştəriyönümlü yanaşma əsasında qurulmasının vacibliyini ön plana çıxarmaq olub.
Məlumata görə, proqram iki modul üzrə həyata keçirilib. Birinci modulda “İnklüziv bank: müştəri mərkəzli yanaşma”, ikinci modulda isə “Müştəri xidmətində inklüzivlik: ünsiyyət, əlçatanlıq və təhlükəsiz xidmət” mövzularında iştirakçılara ətraflı məlumat verilib.
Təlim zamanı “çətin”, “problemli”, “susqun” və “əsəbi” kimi xarakterizə edilən müştəri davranışlarının arxasında dayanan mümkün fiziki, psixososial və koqnitiv səbəblər izah olunub. Eyni zamanda, inklüziv bankçılığın mərhəmət deyil, ədalət və funksionallıq prinsiplərinə əsaslanan xidmət standartı olduğu xüsusi vurğulanıb.
İnteraktiv formatda təşkil olunan proqram çərçivəsində iştirakçılara situativ tapşırıqlar təqdim edilib, real iş mühitində qarşılaşılan hallara uyğun həll yolları müzakirə olunub. Təlimdə həm görünən, həm də görünməyən əlillik anlayışlarına diqqət çəkilərək inklüziv xidmətin eyni xidmətin fərqli üsullarla təqdim olunması olduğu qeyd edilib.
Təlimin sonunda iştirakçılar arasında məmnunluq sorğusu keçirilib.
Qeyd edək ki, təlimin yekun görüşünün keçirilməsi, sorğunun nəticələrinin müzakirəsi və iştirakçılara sertifikatların təqdim olunması fevralın 4-də Bakı Slavyan Universitetində nəzərdə tutulur.
