Naxçıvan Dövlət Universitetinin (NDU) Memarlıq və mühəndislik fakültəsində keçirilən “Elektronika və proqramlaşdırma” sərgisinin iştirakçıları sertifikat və hədiyyələrlə mükafatlandırılıb.
Bu barədə “Tehsil365”ə universitetdən məlumat verilib. Bildirilib ki, sərgidə iştirak edən tələbələr proqramlaşdırma və elektronika sahəsində innovativ düşüncə, yaradıcı texnoloji yanaşma və layihələrin təqdimatında fəal iştiraklarına görə təltif olunublar.
Tədbir çərçivəsində universitetin rektoru Elbrus İsayev tələbələrlə görüşərək onları əldə etdikləri nailiyyətlər münasibətilə təbrik edib, gələcək fəaliyyətlərində uğurlar arzulayıb. Rektor tələbələrlə səmimi söhbət apararaq onların daim öz üzərlərində işləmələrinin, yaradılan imkanlardan səmərəli istifadə etmələrinin vacibliyini vurğulayıb, mübadilə proqramlarının əhəmiyyətindən bəhs edib. O, həmçinin müasir dövrün tələblərinə uyğun olaraq İT bacarıqlarına yiyələnməyin önəmini diqqətə çatdırıb və tələbələrə müvafiq tövsiyələr verib.
Görüş zamanı tələbələr onlara göstərilən diqqət və qayğıya görə rektora minnətdarlıqlarını bildiriblər.
Sonda Elbrus İsayev tərəfindən sərgi iştirakçılarına sertifikatlar təqdim olunub, həmçinin tələbələrə kitab hədiyyə edilib.
Qeyd edək ki, Memarlıq və mühəndislik fakültəsinin tələbələrinin təşəbbüsü və iştirakı ilə təşkil olunan “Elektronika və proqramlaşdırma” sərgisində ekologiya, meliorasiya, energetika və proqramlaşdırma sahələrini əhatə edən 35-dən artıq layihə nümayiş etdirilib.
