“Tehsil365” İnformasiya Agentliyinin layihəsi olan “Şəhidin səsi” proqramının növbəti buraxılışı Vətən müharibəsi şəhidi Cabarzadə Cavid Qorxmaz oğlunun həyat və döyüş yoluna həsr olunub. Buraxılış bu gün, saat 18:00-da yayımlanacaq.
“Tehsil365" xəbər verir ki, Cabarzadə Cavid Qorxmaz oğlu 1997-ci il avqustun 10-da Bakı şəhəri Suraxanı rayonu, Bülbülə qəsəbəsində anadan olub. O, 2003-cü ildə birinci sinfə başlayıb, 2014-cü ildə orta təhsilini başa vurub. Bununla yanaşı, musiqiyə xüsusi maraq göstərən Cavid musiqi məktəbinin tar sinfini bitirib. İdman sahəsinə də böyük həvəsi olan şəhidimiz qədim idman növü sayılan kamandan oxatma ilə məşğul olub.
Cavid Cabarzadə 2015-ci ildə hərbi xidmətə yollanaraq kəşfiyyatçı-snayper ixtisasına yiyələnib. 2016-cı ilin Aprel döyüşlərində, Lələtəpənin azad olunması uğrunda gedən döyüşlərdə iştirak edib, düşmənin canlı qüvvə və texnikasının məhv edilməsində fərqlənib. 2017-ci ildə hərbi xidmətini başa vurub.
2020-ci ilin iyul ayında Tovuz döyüşləri zamanı general-mayor Polad Həşimovun şəhid olmasından sonra Cavid Cabarzadə ailəsinə xəbər vermədən könüllü şəkildə yenidən ordu sıralarına yazılıb. O, sentyabrın 27-də başlanan İkinci Qarabağ müharibəsində Azərbaycan Ordusunun əsgəri kimi döyüşlərə qatılıb.
Şəhidimiz Cəbrayıl, Füzuli və Xocavənd rayonlarının azadlığı uğrunda gedən döyüşlərdə iştirak edib. Cavid Cabarzadə 2020-ci il oktyabrın 24-də Füzuli–Xocavənd istiqamətində gedən ağır döyüşlərdə qəhrəmancasına şəhid olub. O, noyabrın 5-də II Fəxri Xiyabanda dəfn edilib.
Azərbaycan Prezidenti İlham Əliyevin müvafiq sərəncamları ilə Cavid Cabarzadə ölümündən sonra “Vətən uğrunda”, “Füzulinin azad olunmasına görə” medalları, həmçinin döyüşlərdə göstərdiyi şücaətə görə III dərəcəli “Vətənə xidmətə görə” ordeni ilə təltif olunub.
Qeyd edək ki, bu buraxılışın aparıcısı “Tehsil365” İnformasiya Agentliyinin “Könüllü müxbir” layihəsində könüllü müxbir kimi iştirak edərək məzun olan Nərminə Eyyubovadır. Proqramda Cavid Cabarzadənin həyat yolu, vətənpərvərliyi və döyüş şücaəti geniş şəkildə işıqlandırılacaq.