Xəzər Universitetinin Humanitar, təhsil və sosial elmlər fakültəsinin Filologiya ixtisası üzrə IV kurs tələbələrinin AMEA Folklor İnstitutunda keçdikləri elmi-tədqiqat təcrübəsi yekunlaşıb.
“Tehsil365” xəbər verir ki, təcrübə çərçivəsində tələbələr oktyabr–dekabr ayları ərzində institutun elmi fəaliyyəti ilə yaxından tanış olub, folklorşünaslıq sahəsində aparılan tədqiqatlar, nəşrlər və aktual problemlər barədə ətraflı məlumat əldə ediblər. Onlar həmçinin bir sıra nüfuzlu elmi tədbirlərdə iştirak edərək məruzə və çıxışlarla çıxış ediblər. Belə ki, tələbələr I Beynəlxalq Türk Dünyası Ənənəvi Musiqi və Mədəni Kimlik Simpoziumunda, “Qərbi Azərbaycan folkloru: problemlər və perspektivlər” mövzusunda II Respublika elmi konfransında, “Laçın: mədəni yaddaşın folklordan görünən izləri”, Qarabağda Şanlı Zəfərin 5 illiyinə həsr olunmuş “Qırx dörd günün Zəfər dastanı”, eləcə də “Bəxtiyar Vahabzadə yaradıcılığının folklor konteksti” mövzularında keçirilən elmi sessiyalarda fəal iştirak ediblər.
2026-cı il yanvarın 22-də təcrübənin yekunlarına həsr olunmuş yığıncaqda AMEA Folklor İnstitutunun direktoru, filologiya elmləri doktoru Hikmət Quliyev çıxış edərək tələbələrin elmi-tədqiqat təcrübəsində iştirakının onların yeni bilik və bacarıqlar qazanmaları baxımından mühüm əhəmiyyət daşıdığını vurğulayıb. O bildirib ki, bu cür təcrübələr tələbələrin elmi dünyagörüşünün formalaşmasına və gələcək elmi karyeralarına ciddi töhfə verir.
Xəzər Universitetinin Dillər və ədəbiyyatlar departamentinin müdiri, filologiya üzrə fəlsəfə doktoru, dosent Dilbər Zeynalova isə qeyd edib ki, yalnız nəzəri biliklərlə kifayətlənmək müasir tələblərə cavab vermir. Onun sözlərinə görə, tələbələrin praktiki və elmi-tədqiqat təcrübəsi keçməsi, alimlərlə birbaşa ünsiyyətdə olması və elmi mənbələrlə işləmək bacarıqları ixtisaslı kadr hazırlığında mühüm rol oynayır.
Güney Azərbaycan folkloru şöbəsinin müdiri, filologiya elmləri doktoru, dosent Mətanət Abbasova və Folklor və yazılı ədəbiyyat şöbəsinin müdiri, filologiya elmləri doktoru, dosent Leyla Məmmədova da çıxış edərək tələbələrin təcrübə müddətində fəallığını və elmi-tədqiqat işlərinə göstərdikləri marağı yüksək qiymətləndiriblər.
Bildirilib ki, təcrübə dövründə tələbələrin fəaliyyəti iştirak səviyyəsi, təqdimat bacarığı, elmi müzakirələrdə fəallıq, tezis və yekun hesabatların hazırlanması, eləcə də folklor faktlarının qeydə alınması kimi meyarlar əsasında qiymətləndirilib.
Tədbirin sonunda AMEA Folklor İnstitutunun direktoru Hikmət Quliyev tələbələrə sertifikatları təqdim edib.