Azərbaycan Dövlət Pedaqoji Universitetinin (ADPU) Kitabxana-İnformasiya Mərkəzinin ümumi fondu ötən il 652 min 262 nüsxə təşkil edib. Bunun 576 min 482 nüsxəsi kitab fondudur. Kitab fondunun dil bölgüsünə əsasən, 272 min 811 nüsxə Azərbaycan dilində (onlardan 71 min 790 nüsxə latın qrafikalı, 201 min 12 nüsxə kiril əlifbalı), 290 min 762 nüsxə rus dilində, 12 min 909 nüsxə isə digər dillərdə olan nəşrlərdir.
Bu barədə “Tehsil365"ə ADPU-dan məlumat verilib.
Elektron kataloqda 15 min 600 adda 88 min 347 nüsxə ədəbiyyat oxucuların istifadəsinə verilib. Elektron resursların 71 min 790 nüsxəsi Azərbaycan, 1998 nüsxəsi rus, 14 min 559 nüsxəsi isə digər dillərdədir.
2025-ci ildə Kitabxana-İnformasiya Mərkəzinin oxucularının ümumi sayı 10 min 277 nəfər, onlayn müraciətlərin sayı isə 40 min 203 olub.
Ötən il ərzində fonda 1 933 nüsxə kitab daxil olub. Onlardan 1732 nüsxə Azərbaycan, 80 nüsxə rus, 121 nüsxə digər xarici dillərdədir. Eyni zamanda fond 1 361 dərslik və dərs vəsaiti, 366 elmi ədəbiyyat, 136 bədii ədəbiyyat, 70 ictimai-siyasi nəşr, 19 elmlər doktoru və fəlsəfə doktoru dissertasiyası, 95 magistr dissertasiyası, 101 avtoreferat, 115 proqram və 17 disk ilə zənginləşdirilib.
Dövri mətbuata abunə çərçivəsində 9 adda qəzet və 5 adda jurnal oxucuların istifadəsinə təqdim olunub.
İl ərzində Kitabxanaya 10 min 277 oxucu gəlişi qeydə alınıb, 22 min 171 nüsxə kitab verilişi həyata keçirilib. Onlardan 3319-u elektron xidmətlər, 10 min 35 nəfər isə ənənəvi oxu zallarından istifadə edib.
2025-ci ildə Kitabxana-İnformasiya Mərkəzi tərəfindən bir sıra elmi-maarifləndirici tədbirlər, sərgilər və respublika səviyyəli forum və seminarlarda iştirak təmin edilib. Bunlar sırasında Ümummilli Lider Heydər Əliyevin anadan olmasının 102-ci ildönümünə həsr olunmuş “Heydər Əliyev-102” adlı sərgi, “Konstitusiya və Suverenlik İli” çərçivəsində daimi kitab sərgiləri, eləcə də müxtəlif ali təhsil müəssisələrində keçirilən forum, seminar və elmi-praktiki tədbirlər xüsusi yer tutur.
Bununla yanaşı, “Beynəlxalq Kitab Bağışlama Günü”, magistrantların VIII elmi konfransı çərçivəsində dövri elmi nəşrlərin sərgisi, Humanitar Kollec tələbələrinin diplomqabağı təcrübəsinin başa çatmasına həsr olunmuş tədbir və “Süni intellekt və kitabxanalar: Məktəbdən rəqəmsal gələcəyə” mövzusunda elmi-maarifləndirici görüş təşkil edilib.