Yanvarın 27-də Bakı Slavyan Universitetində (BSU) Azərbaycan Respublikasının “Azərbaycan Mədəniyyəti–2040” Konsepsiyasına uyğun olaraq BSU-nun Tədbirlər Planı çərçivəsində Azərbaycan Dövlət Pedaqoji Universitetinin (ADPU) Beynəlxalq əlaqələr üzrə prorektoru, filologiya elmləri doktoru, professor, Prezident təqaüdçüsü, Əməkdar müəllim, Qərbi Azərbaycan İcması (QAİ) İdarə Heyətinin üzvü Mahirə Hüseynovanın “Qərbi Azərbaycan: Danışan izlərin işığında” adlı kitabının təqdimatı keçirilib.
Bu barədə "Tehsil365"ə universitetdən məlumat verilib. Bildirilib ki, tədbirdə BSU-nun rektoru Anar Nağıyev, professor Mahirə Hüseynova, Milli Məclisin deputatları Vüqar Rəhimzadə və Məlahət İbrahimqızı, Bakı Dövlət Universitetinin Üzvi kimya kafedrasının müdiri, akademik Abel Məhərrəmov, Azərbaycanda Atatürk Mərkəzinin direktoru, akademik Nizami Cəfərov, Azərbaycan Milli Kitabxanasının direktoru, professor Kərim Tahirov, Prezident Kitabxanasının direktor müşaviri, tarix üzrə fəlsəfə doktoru Nazim Mustafa, ADPU-nun Elmi-təşkilati şöbəsinin müdiri, professor İbrahim Bayramov, universitetin professor-müəllim heyəti və tələbələri iştirak ediblər.
Tədbir Azərbaycan Respublikasının Dövlət Himninin səsləndirilməsi, Ulu Öndər Heydər Əliyevin və Vətənimizin müstəqilliyi, suverenliyi, ərazi bütövlüyü uğrunda canlarını qurban verən şəhidlərin xatirəsinin bir dəqiqəlik sükutla yad edilməsi ilə başlayıb. Daha sonra professor Mahirə Hüseynovanın elmi-pedaqoji, ictimai fəaliyyəti və bədii yaradıcılığına həsr olunmuş videoçarx nümayiş etdirilib.
BSU-nun rektoru Anar Nağıyev çıxışında kitabın elmi və ictimai əhəmiyyətini vurğulayıb. O bildirib ki, Qərbi Azərbaycanda Azərbaycan tarixinin, mədəni irsinin və milli dəyərlərinin sistemli şəkildə tədqiqinə həsr olunan bu nəşr mühüm elmi əhəmiyyət daşıyır. Rektor qeyd edib ki, kitab Azərbaycan Respublikasının Prezidenti İlham Əliyevin Qərbi Azərbaycanla bağlı çıxışları əsasında hazırlanıb və Qərbi Azərbaycana qayıdış konsepsiyası, azərbaycançılıq ideologiyası, milli dəyərlər, Azərbaycan dili və tarixi ilə bağlı dövlət siyasətinin konseptual nümunəsi kimi təqdim olunur.
A.Nağıyev müəllifin elmi yanaşmasını yüksək qiymətləndirərək bildirib ki, kitabda aparılan tədqiqatlar tarixi faktlarla yanaşı folklor nümunələri, dil materialları və bədii elementlər vasitəsilə milli yaddaşın qorunmasına xidmət edir. O, BSU-da fəaliyyət göstərən Qərbi Azərbaycan Tədqiqat Mərkəzinin bu sahədə gördüyü işlərdən bəhs edərək professor Mahirə Hüseynovanın bu istiqamətdə verdiyi dəstəyi qeyd edib.
Tədbirdə Milli Məclisin deputatları, ali təhsil müəssisələrinin rəhbər və nümayəndələri, eləcə də universitetin professor-müəllim heyəti çıxış edərək kitabda Qərbi Azərbaycan reallıqlarının tarixi, elmi və mədəni aspektlərdən sistemli şəkildə araşdırıldığını vurğulayıblar.
Təqdimatın sonunda professor Mahirə Hüseynova çıxış edərək kitab barədə ətraflı məlumat verib, tədqiqat əsərində Qərbi Azərbaycanın tarixi-mədəni irsinin, dil, folklor və milli-mənəvi dəyərlərinin elmi əsaslarla araşdırıldığını diqqətə çatdırıb. O, kitabın təqdimatına görə BSU rəhbərliyinə təşəkkürünü bildirib.
