Bu gün Azərbaycan muğam sənətinin görkəmli nümayəndəsi, Xalq artisti İslam Rzayevin anım günüdür.
“Tehsil365” xatırladır ki, İslam Rzayev 11 noyabr 1934-cü ildə Füzuli rayonunun Sərdarlı kəndində anadan olub. O, Qarabağ xanəndəlik məktəbinin layiqli davamçılarından biri kimi Azərbaycan muğam sənətində dərin iz qoymuş sənətkarlardandır. Onun səsini ilk dəyərləndirən və sənət yoluna istiqamət verən böyük xanəndə Seyid Şuşinski olmuşdur.
İslam Rzayev peşəkar musiqi təhsilini 1951–1956-cı illərdə Asəf Zeynallı adına Azərbaycan Dövlət Musiqi Texnikumunda, Seyid Şuşinskinin sinfində almış, muğam dəstgahlarını mükəmməl şəkildə mənimsəmişdir. O, həmçinin Zülfü Adıgözəlov və Həqiqət Rzayeva kimi tanınmış sənətkarlardan dərs alaraq ifaçılıq sənətini daha da təkmilləşdirmiş, 1976-cı ildə Azərbaycan Dövlət İncəsənət İnstitutunu bitirmişdir.
1958-ci ildən ömrünün sonunadək Azərbaycan Dövlət Akademik Filarmoniyasının solisti kimi fəaliyyət göstərən xanəndə, eyni zamanda pedaqoji işlə də məşğul olmuş, yetişdirdiyi tələbələr xanəndəlik məktəbinin layiqli davamçıları kimi tanınmışdır. Onun təşəbbüsü ilə 1989-cu ildə Bakıda ilk Dövlət Muğam Teatrı yaradılmış, İslam Rzayev həyatının sonunadək bu teatrın bədii rəhbəri vəzifəsində çalışmışdır.
Xalq artistinin ifa etdiyi “Çahargah”, “Bayatı-Kürd”, “Mahur–Hindi”, “Rast” muğam dəstgahları Azərbaycan Televiziyasının qızıl fonduna daxil edilmişdir. O, həmçinin bir sıra mahnıların müəllifidir. “Gəl inad etmə”, “Dağlar başı”, “Almadərən” kimi mahnılar bu gün də sevilərək dinlənilir. İslam Rzayev bəstəkar əsərlərinə də müraciət etmiş, Cahangir Cahangirovun “Nəsimi”, “Aşıq Alı” və digər kantatalarında solo partiyaları ifa etmişdir.
Sənətkar yaradıcılığı dövründə 70-dən artıq ölkədə qastrol səfərlərində olmuş, Fransa, İngiltərə, İran, İraq, Əlcəzair, Türkiyə, İsrail, Kolumbiya, Peru, Kuba, Yaponiya, Hindistan, Nepal və digər ölkələrdə Azərbaycan muğam sənətini layiqincə təmsil etmişdir.
Xalq artisti İslam Rzayev 26 yanvar 2008-ci ildə Bakı şəhərində vəfat etmiş, Fəxri Xiyabanda dəfn olunmuşdur.