Bu gün Azərbaycanın Milli Qəhrəmanı, polkovnik-leytenant Riad Fikrət oğlu Əhmədovun anım günüdür.
“Tehsil365”in məlumatına görə, Riad Əhmədov 1956-cı il dekabrın 20-də Bakı şəhərində anadan olub. Onun ata babası Həmid Əhmədov Qərbi Azərbaycanda dünyaya gəlmişdir. Riad Əhmədov ali təhsilini 1979-cu ildə Azərbaycan Dövlət Universitetinin hüquq fakültəsində almış və təhsilini fərqlənmə diplomu ilə başa vurmuşdur.
Əmək fəaliyyətinə hələ tələbəlik illərində başlayan Riad Əhmədov 1976–1979-cu illərdə Azərbaycan SSR Ədliyyə Nazirliyi yanında Məhkəmə Ekspertizası İnstitutunda laborant kimi çalışıb. Daha sonra 1979–1980-ci illərdə Qanun Layihələrinin Hazırlanması və Qanunvericiliyin Sistemləşdirilməsi idarəsində məsləhətçi, 1980–1981-ci illərdə isə Ədliyyə Nazirliyinin kadrlar şöbəsində baş məsləhətçi vəzifələrində fəaliyyət göstərib.
1981-ci ildən təhlükəsizlik orqanlarında xidmətə başlayan Riad Əhmədov 1981–1982-ci illərdə DTK-nın Minskdəki Ali Məktəbində, 1984-cü ildə isə Y. V. Andropov adına institut nəzdindəki kurslarda təhsil alaraq peşəkar kadr kimi formalaşıb.
Vətənimizin ən ağır günlərində ön cəbhədə olan Riad Əhmədov 1992-ci ildə Azərbaycan Respublikası Müdafiə Nazirliyinin Kəşfiyyat İdarəsi rəisinin müavini vəzifəsinə təyin edilib. Onun rəhbərlik etdiyi xüsusi kəşfiyyat dəstəsi Qarabağ uğrunda gedən döyüşlərdə düşmənin xeyli canlı qüvvəsini və hərbi texnikasını məhv etmişdir.
Riad Əhmədov 1992-ci il yanvarın 26-da rəhbərlik etdiyi kəşfiyyat qrupu ilə birlikdə Daşaltı kəndi uğrunda gedən döyüşlərdə yaralanaraq itkin düşmüşdür. Uzun illər onun taleyi naməlum qalmışdır. 18 sentyabr 2023-cü ildə Bakıda keçirilən beynəlxalq konfransda Riad Əhmədovun və digər itkin azərbaycanlıların nəşlərinin tapıldığı və şəxsiyyətinin müəyyən edildiyi açıqlanmışdır.
30 sentyabr 2023-cü ildə Dövlət Təhlükəsizliyi Xidmətinin Mədəniyyət Mərkəzində Riad Əhmədovla vida mərasimi keçirilmiş, daha sonra o, İkinci Fəxri Xiyabanda dəfn edilmişdir.
Qeyd edək ki, Riad Əhmədov Azərbaycan SSR Nazirlər Soveti sədrinin müavini olmuş Fikrət Əhmədovun oğludur. Bacısı bəstəkar, Azərbaycan Respublikasının əməkdar incəsənət xadimi Mehriban Əhmədova, həyat yoldaşı Elmira xanım isə Azərbaycanın sabiq milli təhlükəsizlik naziri Eldar Mahmudovun bacısıdır.
Azərbaycan Respublikası Prezidentinin 7 iyun 1992-ci il tarixli 833 saylı Fərmanı ilə polkovnik-leytenant Riad Fikrət oğlu Əhmədov ölümündən sonra “Azərbaycanın Milli Qəhrəmanı” adına layiq görülmüşdür.