Yanvarın 28-də Azərbaycan Dillər Universitetində (ADU) Qazaxıstan, Özbəkistan və Qırğızıstandan olan elm və təhsil nümayəndələri ilə görüş keçirilib.
Bu barədə "Tehsil365"ə universitetdən məlumat verilib. Bildirilib ki, ADU-nun rektoru, akademik Kamal Abdulla qonaqları salamlayaraq, onları universitetdə görməkdən məmnunluğunu bildirib. Qeyd olunub ki, ADU bu ölkələrin elm və təhsil müəssisələri ilə sıx əlaqə saxlayır və müxtəlif mübadilə proqramlarını həyata keçirir.
Rektor qarşılıqlı elmi görüşlərin və layihələrin əhəmiyyətindən danışaraq vurğulayıb ki, Azərbaycana dost və qardaş ölkələr olan Qazaxıstan, Özbəkistan və Qırğızıstanın dili, mədəniyyəti, ədəbiyyatı və tarixi ilə ortaq cəhətlərimiz çoxdur. Elmi və mədəni əməkdaşlıq üçün yeni perspektivlər tərəfdaşlıq üçün əlverişli imkanlar yaradır. ADU universitetlərlə əlaqələrin inkişafına, bakalavr dərəcəsi üzrə ikili diplom proqramlarının həyata keçirilməsinə və uzunmüddətli tərəfdaşlıq əlaqələrinin qurulmasına böyük önəm verir.
Görüşdə Qazaxıstan Təhsil Nazirliyi və ORLEU Təkmilləşdirmə İnstitutunun direktoru Meruert Medetbekova, Nizami adına Özbəkistan Pedaqoji Universitetinin Nəzəriyyə və metodika kafedrasının dosenti Ugiloy Kusanova və Qırğızıstan İxtisasartırma və Yenidən Hazırlıq İnstitutunun Beynəlxalq şöbəsinin baş mütəxəssisi Akunbek Ergeşov çıxış edərək, ADU rəhbərliyinə və kollektivinə səmimi qarşılanmaya görə təşəkkürlərini bildiriblər.
Görüş zamanı qonaqlara ADU-nun beynəlxalq əlaqələri, müəllim-tələbə mübadilə proqramları və təlimlər haqqında ətraflı məlumat verilib. Sonda qonaqlara kitab hədiyyələri təqdim olunub və xatirə şəkli çəkdirilib.
