Azərbaycan təsviri sənətinin tanınmış nümayəndələrindən biri, Əməkdar rəssam Gennadi Demyanoviç Brijatyuk 1935-ci il 1 yanvar tarixində Gəncə şəhərində anadan olub. O, rəssamlıq təhsilini Bakıda yerləşən Əzim Əzimzadə adına Bakı Rəssamlıq Məktəbində alıb. Təhsil müddətində fasilələrlə oxumasına baxmayaraq, məktəbi ümumilikdə səkkiz ilə başa vurub.
“Təhsil365”in məlumatına görə, Gennadi Brijatyuk yaradıcılıq fəaliyyətinə 1940–1950-ci illərdən etibarən başlayıb. İlk dövrlərdə sevgi mövzulu səhnələrə və xüsusilə gül təsvirlərinə üstünlük verən rəssam, zamanla peyzaj janrında çəkdiyi əsərlərlə tanınıb. Onun Abşeron mövzulu tabloları xüsusi diqqət çəkir və bu səbəbdən Brijatyuk Abşeron rəssamlıq məktəbinin nümayəndəsi hesab olunur. Bəzi sənətşünaslar onun yaradıcılıq üslubunu sosialist realizmi istiqamətinə aid edirlər.
Rəssamın yaradıcılığı ərzində çəkdiyi əsərlərin dəqiq sayı məlum deyil. Onun tabloları müxtəlif muzeylərdə və şəxsi kolleksiyalarda saxlanılır. Bir sıra əsərləri Azərbaycan Milli İncəsənət Muzeyində, eləcə də Moskva şəhərində Azərbaycanın Rusiya Federasiyasındakı səfirliyində qorunur.
Xarici ölkələrə səfər etməməsinə baxmayaraq, Brijatyukun əsərləri ABŞ, Böyük Britaniya, Fransa, İtaliya, Türkiyə və Almaniyada şəxsi kolleksiyalarda yer alıb. Məlumata görə, onun əsərlərinin ən böyük hissəsi Fransada toplanıb. Azərbaycanda isə ən iri şəxsi kolleksiya fotoqrafiya üzrə professor Hüseyn Hüseynzadəyə məxsusdur. O, rəssamla şəxsi tanışlığı dövründə 40 il ərzində 300-dən çox tablo toplamışdır.
Gennadi Brijatyuk rəssamlıqla yanaşı şeirlər də yazıb, lakin onları heç vaxt nəşr etdirməyib. Azərbaycan Respublikasının 1-ci Prezidenti Ayaz Mütəllibovun 4 mart 1992-ci il tarixli sərəncamı ilə ona “Azərbaycan Respublikasının əməkdar rəssamı” fəxri adı verilib.
Rəssam ömrünün son illərini Bakı şəhərində, İstiqlaliyyət və Şeyx Şamil küçələrinin kəsişməsində yerləşən şəxsi emalatxanasında keçirib. Gennadi Demyanoviç Brijatyuk 11 iyun 2008-ci ildə, öz evində vəfat edib.