Bu gün Azərbaycan musiqi mədəniyyətinin tanınmış simalarından biri, Xalq artisti Mübariz Tağıyevin doğum günüdür.
"Tehsil365" xatırladır ki, Mübariz Tağıyev 31 yanvar 1948-ci ildə İrəvan şəhərində anadan olub. Orta təhsilini İrəvan şəhərindəki Axundov adına 9 saylı orta məktəbdə alıb. Gənclik illərində peşəkar idmançı kimi üzgüçülüklə məşğul olub.
Sənət yoluna Ermənistan Dövlət Orkestrində solist kimi başlayan Mübariz Tağıyev, sonralar Bakıya gələrək Rəşid Behbudovun rəhbərliyi ilə Mahnı Teatrında solist kimi fəaliyyət göstərib. 1985-ci ildən etibarən isə Azərbaycan Dövlət Teleradio Komitəsində, görkəmli bəstəkar Rafiq Babayevin rəhbərliyi ilə Estrada-simfonik orkestrin solisti vəzifəsində çalışıb.
Azərbaycan mədəniyyətinin inkişafındakı xidmətlərinə görə Mübariz Tağıyev 2000-ci ildə “Azərbaycan Respublikasının əməkdar artisti”, 16 may 2006-cı ildə “Azərbaycan Respublikasının Xalq artisti” fəxri adına layiq görülüb. Həmçinin 14 sentyabr 2012-ci ildə Azərbaycan Respublikası Prezidentinin fərdi təqaüdü ilə təltif edilib.
Sənətkarın atası Hüseyn Tağıyev musiqiçi olub, kamança ifaçısı kimi tanınıb. Anası Rübabə xanım Babayeva isə “Sovet Ermənistanı” qəzetində jurnalist kimi fəaliyyət göstərib.
Şəxsi həyatı ilə bağlı qeyd edək ki, Mübariz Tağıyev iki dəfə ailə həyatı qurub. İkinci evlilikdən iki qızı var. Onun ikinci həyat yoldaşı rəqs müəlliməsidir.
Xalq artisti Mübariz Tağıyev bu gün də Azərbaycan estrada sənətinin yadda qalan və sevilən simalarından biri kimi xatırlanır.