Azərbaycan Ordusunun Xüsusi Təyinatlı Qüvvələrinin zabiti, Vətən müharibəsi şəhidi Elton Baba oğlu Qənbərli 1 fevral 1997-ci ildə Şərur rayonunun Ələkli kəndində anadan olub. Qeyd edək ki, bu gün şəhidin doğum günüdür. Yaşasaydı, 28 yaşını qeyd edəcəkdi.
“Tehsil365" xəbər verir ki, o, 2003–2011-ci illərdə Ələkli kənd tam orta məktəbdə təhsil alıb və 9-cu sinfi bitirdikdən sonra 2011-ci ildə Heydər Əliyev adına Azərbaycan Ali Hərbi Məktəbinə daxil olub. 2014–2018-ci illərdə isə Azərbaycan Ali Hərbi Akademiyasında hərbi təhsilini davam etdirib.
Uşaqlıqdan hərbçi olmağı arzulayan Eltonun hərbi məktəbə qəbul olması ailəsi üçün böyük sürpriz olub. Üç uşaqlı ailənin ən sakit, eyni zamanda ən gülərüz övladı kimi tanınan Elton, yaxınlarının xatirəsində saf və mələk təbiətli bir insan kimi qalıb.
Şəhidin bacısı Nargül Qənbərli bildirir ki, Elton qazandığı uğurların paylaşılmasını sevməyib: “Bir dəfə onun nailiyyətləri ilə bağlı paylaşım etmişdim, xahiş etdi ki, silim. Deyirdi ki, mən bunları göstəriş üçün etməmişəm.”
Elton Qənbərli bir çox çətin hərbi təlim və kurslarda iştirak edib. O cümlədən, 176 nəfərin qatıldığı “SAT” hərbi kursunda yaşca ən kiçik iştirakçı olsa da, təlimi uğurla başa vuran 8 nəfərdən biri olub. Daha sonra XTQ kursunu birinciliklə bitirib və N saylı hərbi hissədə xidmətə başlayıb.
Hərbi sahə ilə yanaşı, o, incəsənətə də maraq göstərib, musiqi məktəbini bitirib, nağara ifa edib, 12 növ Şərur yallısını bilib. Mütaliəyə xüsusi önəm verən şəhidin sevdiyi yazarlardan biri Fyodor Dostoyevski olub.
Son vəzifəsi qrup komandiri müavini və kəşfiyyatçı olan Elton Qənbərli 44 günlük Vətən müharibəsi zamanı Suqovuşan, Füzuli, Zəngilan, Cəbrayıl və Qubadlı istiqamətlərində döyüşüb. 23 gün ərzində qəhrəmanlıq göstərən zabit yaralansa da, hospitala getməyərək döyüş meydanını tərk etməyib.
Elton Qənbərli Qubadlının işğaldan azad olunması uğrunda gedən döyüşlərdə şəhid olub və 24 oktyabr tarixində Şərur rayonu Şəhidlər xiyabanında torpağa tapşırılıb.
Şəhid XTQ zabiti Prezident İlham Əliyevin sərəncamları ilə “Vətən uğrunda”, “Döyüşdə fərqlənməyə görə” və “Cəbrayılın azad olunmasına görə” medalları ilə təltif edilib.