2 Fevral - adi bir gün deyil. Bu tarix Azərbaycanın gənclərə bağladığı ümidin adı, gələcəyə açılan yolun başlanğıcıdır. Çünki gənclik təkcə yaş məsələsi yox, düşünmək, risk almaq və dəyişmək cəsarətidir.
1997-ci ildə ümummilli lider Heydər Əliyevin imzaladığı fərmanla Azərbaycan Gənclər Günü təsis ediləndə, bu addım sadəcə bayram yaratmaq məqsədi daşımırdı. Bu, dövlətin açıq mesajı idi: “Bu ölkənin sabahı gənclərin əlindədir və biz onlara inanırıq.” Gəncliyə inam dövlət siyasətinin əsas sütunlarından birinə çevrildi.
Bu yol bu gün Prezident İlham Əliyev tərəfindən məqsədyönlü şəkildə davam etdirilir. Təhsil proqramları, gənclərin dövlət idarəçiliyinə cəlb olunması, beynəlxalq layihələrdə iştirakı göstərir ki, gənclər artıq kənardan baxan deyil, qərarların içində olan tərəfdir.
Müasir Azərbaycan gənci yalnız diplomla yox, mövqeyi ilə ölçülür. O, sual verir, araşdırır, tənqid edir, amma eyni zamanda Vətəninə sahib çıxır. Bu gənclik müharibə meydanında da, elm laboratoriyasında da, idman arenasında da öz sözünü deməyi bacarıb.
2 Fevral bizə xatırladır ki, gənclər gələcəyi gözləmirlər, onu qururlar. Bu gün məsuliyyət daşıyan hər kəsin günüdür. Bu yol davam edir. Çünki gənclik bitmir, dəyişir, böyüyür və tarix yaradır.
Osman Azadoğlu
Azərbaycan Dövlət Pedaqoji Universitetinin müəllimi