Bu gün — 3 fevral Azərbaycanın Milli Qəhrəmanı Bəylər Tapdıq oğlu Ağayevin doğum günüdür.
“Tehsil365” xatırladır ki, Bəylər Ağayev 3 fevral 1969-cu ildə Qubadlı rayonunun Qarağac kəndində anadan olub. Hərbi xidmətini Almaniya Demokratik Respublikasında başa vurduqdan sonra doğma kəndinə qayıdıb. 1990-cı ildə Azərbaycan Dövlət İnşaat Mühəndisləri İnstitutuna daxil olub.
Erməni silahlı birləşmələrinin ölkəmizə qarşı təcavüzü dövründə Bəylər Ağayev 1992-ci ildə təhsilini yarımçıq qoyaraq könüllü şəkildə Azərbaycan Milli Ordusunun sıralarına yazılıb. Qısa müddətdə yüksək bacarığı ilə seçilərək bölmə komandiri təyin edilib.
O, Laçın rayonu uğrunda gedən döyüşlərdə xüsusi igidlik göstərib. Səfiyan, Yuxarı və Aşağı Fərəcan, Mazutlu, Türklər və Suarası kəndləri istiqamətində aparılan döyüşlərdə düşmənin xeyli canlı qüvvəsini və hərbi texnikasını məhv edib.
1992-ci il avqustun 6-da Bəylər Ağayev döyüş yoldaşları ilə birlikdə mühasirəyə düşüb. Qəhrəmancasına döyüşərək düşmənə ağır itkilər versə də, həmin döyüşdə şəhid olub.
Azərbaycan Respublikası Prezidentinin 7 dekabr 1992-ci il tarixli, 350 saylı fərmanı ilə Bəylər Tapdıq oğlu Ağayevə ölümündən sonra “Azərbaycanın Milli Qəhrəmanı” adı verilib.
Qubadlı rayonunun Qarağac kənd tam orta məktəbi onun adını daşıyır. Milli Qəhrəman doğulduğu Qarağac kəndində dəfn edilib.