Azərbaycan Respublikasının Gənclər Fondunun dəstəyi, Azərbaycanlı Tələbələr və Məzunlar Platformasının (ASAP) təşkilatçılığı ilə ölkəmizdə və Macarıstanda 2 Fevral – Azərbaycan Gəncləri Gününə həsr olunmuş silsilə tədbirlər keçirilib.
"Tehsil365" xəbər verir ki, Azərbaycan Gəncləri Günü ilə əlaqədar təşkil olunan “Engage and Exchange” adlı şəbəkələşmə tədbirində ASAP-ın İdarə Heyətinin üzvləri, məzun birlikləri, eləcə də xarici ölkələrdə fəaliyyət göstərən nümayəndəliklərin üzvləri iştirak ediblər. Tədbir çərçivəsində gənclərin bir-birilərini daha yaxından tanıması, bilik və təcrübə mübadiləsinin aparılması, gələcək əməkdaşlıq imkanlarının formalaşdırılması məqsədilə müxtəlif şəbəkələşmə fəaliyyətləri təşkil olunub.
Tədbirdə açılış nitqi ilə çıxış edən ASAP-ın İdarə Heyətinin sədri Milana Mir Feyzullazadə, icraçı direktor Güldanə Dadaşova və Azərbaycan Respublikası Gənclər Fondunun Gənclər təşkilatları ilə iş şöbəsinin müdiri Nail Şükürov xaricdə təhsil alan azərbaycanlı gənclərin ölkəmizin beynəlxalq arenada layiqli təmsilçiliyindəki rolundan, gənclərə göstərilən dövlət dəstəyindən, eləcə də insan kapitalının gücləndirilməsinə xidmət edən təşəbbüslərdən danışıblar. Qeyd olunub ki, Ümummilli Lider Heydər Əliyev tərəfindən əsası qoyulan dövlət gənclər siyasətinin Prezident cənab İlham Əliyev tərəfindən uğurla davam etdirilməsi nəticəsində Azərbaycan gəncləri bu gün cəmiyyətin bütün sahələrində və beynəlxalq müstəvidə özlərini doğruldurlar.
Azərbaycan Gəncləri Gününə həsr olunmuş növbəti tədbir Macarıstanın Budapeşt şəhərində baş tutub. Macarıstandakı Azərbaycan Evində keçirilən “Youth Connect” adlı görüş zamanı azərbaycanlı gənclərin il ərzində həyata keçirdikləri fəaliyyətlər və gələcək prioritetlər müzakirə olunub. Görüşdə gənclərin ictimai fəallığının artırılması, milli dəyərlərin təbliği, Azərbaycan həqiqətlərinin beynəlxalq ictimaiyyətə çatdırılması və təşkilatlanmanın gücləndirilməsi məsələləri diqqət mərkəzində olub. Tədbirin sonunda istedadlı azərbaycanlı gənclərin ifasında musiqi və rəqs kompozisiyaları nümayiş etdirilib.
Bundan əlavə, Azərbaycan Gəncləri Gününə həsr olunmuş video layihə də hazırlanıb. Dünyanın müxtəlif ölkələrində fəaliyyət göstərən ASAP nümayəndəlik üzvlərinin iştirak etdiyi layihə çərçivəsində gənclər bu əlamətdar günün əhəmiyyəti ilə bağlı fikirlərini bölüşüb və Azərbaycan gənclərini təbrik ediblər.
