Fevralın 1-də ümumtəhsil müəssisələrinin IX–XI sinif şagirdləri arasında VI Azərbaycan Astronomiya Olimpiadasının ilk mərhələsi təşkil olunub.
Bu barədə "Tehsil365"ə universitetdən məlumat verilib. Bildirilib ki, onlayn formatda keçirilən olimpiadada iştirak üçün ümumilikdə 2133 şagird qeydiyyatdan keçib. Təşkilat komitəsinin qərarına əsasən, maksimal 100 baldan 65 və daha yüksək nəticə göstərən iştirakçılar olimpiadanın final mərhələsinə vəsiqə qazanıblar. Final mərhələsində iştirak edəcək şagirdlərə yaxın günlərdə ətraflı məlumat veriləcəyi bildirilib.
Qeyd edək ki, VI Azərbaycan Astronomiya Olimpiadasının final mərhələsinin qalibləri Vyetnamda keçiriləcək XIX Beynəlxalq Astronomiya və Astrofizika Olimpiadasına hazırlıq dərslərinə cəlb olunacaqlar. Hazırlıq prosesinin Bakı Dövlət Universiteti və Respublika Uşaq-Gənclər İnkişaf Mərkəzinin ekspertləri tərəfindən universitet və mərkəzin bazasında aparılması nəzərdə tutulur.
Bununla yanaşı, beynəlxalq olimpiadaya seçilmiş komanda üzvləri üçün Şamaxı Astrofizika Rəsədxanasında bir həftəlik yay düşərgəsi təşkil ediləcək. “Həvəskar Astronomlar Cəmiyyəti” İctimai Birliyi isə məktəblilər üçün teleskoplardan istifadə qaydaları ilə bağlı təlimlər keçirəcək. Azərbaycan komandası Beynəlxalq Astronomiya və Astrofizika Olimpiadasında Azərbaycan Respublikası Təhsil İnstitutunun dəstəyi ilə iştirak edəcək.
VI Azərbaycan Astronomiya Olimpiadası və XIX Beynəlxalq Astronomiya və Astrofizika Olimpiadasına hazırlıq dərsləri Cənubi Qafqazda yeganə planetarium olan Tusi-Bohm Planetariumunun baş sponsorluğu ilə həyata keçirilir.