Fevralın 3-də Azərbaycan Dillər Universiteti (ADU) ilə Cənubi Koreyanın Sunqşil Universiteti arasında Anlaşma Memorandumu imzalanıb.
"Tehsil365" xəbər verir ki, ADU-nun rektoru, akademik Kamal Abdulla qonaqları salamlayaraq, onları universitetdə görməkdən məmnun olduğunu bildirib. Qeyd olunub ki, son illər ADU ilə xarici ölkə universitetləri arasında elmi və mədəni əməkdaşlıq istiqamətində bir sıra tədbirlər həyata keçirilir.
Akademik Kamal Abdulla çıxışında əməkdaşlıq çərçivəsində akademik mübadilə, təcrübə və karyera imkanlarının təhlili, qarşılıqlı elmi konfransların keçirilməsi, dil və mədəniyyət mərkəzlərinin fəaliyyəti ilə bağlı addımların atılmasının nəzərdə tutulduğunu bildirib. O, həmçinin qeyd edib ki, Koreya dili və mədəniyyəti mərkəzi tələbələr üçün böyük maraq doğurur və Azərbaycan dili və mədəniyyəti mərkəzinin Koreyada yaradılması perspektivi mövcuddur.
Koreya Tədqiqatlar İnstitutunun direktoru Cha Bong Jun Azərbaycan Dillər Universitetində olmaqdan məmnunluğunu ifadə edərək, ADU-nun beynəlxalq əlaqələrə verdiyi önəmi yüksək qiymətləndirib. O, imzalanan Memorandumun iki ölkə arasında akademik körpünün möhkəmlənməsinə xidmət edəcəyini və uzunmüddətli perspektivdə uğurlu nəticələr verəcəyini vurğulayıb.
Çıxışlardan sonra tərəflər arasında Anlaşma Memorandumu imzalanıb. Tədbirin sonunda qarşılıqlı əməkdaşlıq imkanları, gələcək birgə fəaliyyət istiqamətləri və konkret addımlar ətrafında müzakirələr aparılıb.
