Təhsil İnstitutu doktorantlar üçün növbəti elmi seminar təşkil edib.
İnstitutdan “Tehsil365"ə bildirilib ki, seminarlar institutun elmi-pedaqoji kadrların hazırlanması istiqamətində həyata keçirdiyi sistemli fəaliyyətin tərkib hissəsi kimi doktorantların elmi-tədqiqat bacarıqlarının inkişafını hədəfləyir.
Seminarın spikeri institutun direktor müavini pedaqogika üzrə fəlsəfə doktoru, dosent İlham Cavadov olub. Elmi seminar “Pedaqoji tədqiqatların təşkili və qiymətləndirilməsi texnologiyası” mövzusuna həsr edilib.
Tədbir çərçivəsində pedaqoji tədqiqatların planlaşdırılması, metodoloji əsasların düzgün seçilməsi və tədqiqat dizaynının qurulması ilə bağlı məsələlər ətraflı şəkildə izah edilib. Eyni zamanda, elmi problemlərin aktuallığının əsaslandırılması, elmi nəticələrin obyektiv qiymətləndirilməsi və onların tətbiq imkanları barədə məlumat verilib.
Seminar zamanı müasir pedaqoji tədqiqatlarda istifadə olunan yanaşmalar, keyfiyyət və etibarlılıq meyarları, elmi yeniliyin müəyyənləşdirilməsi və nəticələrin ictimaiyyətə təqdim olunması ilə bağlı praktiki tövsiyələr də səsləndirilib.
İnteraktiv müzakirə formatında keçirilən seminarda doktorantları maraqlandıran suallar cavablandırılıb, elmi-tədqiqat prosesində rast gəlinən aktual problemlər və onların həlli yolları ətrafında fikir mübadiləsi aparılıb.
Təhsil İnstitutu tərəfindən doktorantların elmi-pedaqoji hazırlığının gücləndirilməsi, gənc tədqiqatçıların elmi potensialının artırılması və ali təhsildə elmi keyfiyyətin yüksəldilməsi məqsədilə bu kimi seminar və elmi tədbirlərin davamlı olaraq həyata keçirilməsi planlaşdırılır.
