“Rəqəmsal məktəb” platformasında “Məktəb sorğusu” bölməsi vasitəsilə valideyn məmnuniyyətinə dair sorğu keçirilir. Sorğu valideynlərin təhsil prosesi ilə bağlı rəy və təkliflərini operativ və rahat şəkildə ifadə etməsinə imkan yaradır.
Bu barədə “Tehsil365”ə Bakı Şəhəri Üzrə Təhsil İdarəsindən məlumat verilib. Bildirilib ki, toplanılan rəylər təhlil edilərək mövcud vəziyyətin qiymətləndirilməsinə, problemlərin vaxtında müəyyənləşdirilməsinə və daha səmərəli qərarların qəbuluna şərait yaradır.
Qeyd olunub ki, sorğuda valideyn yalnız övladının təhsil aldığı müəssisə ilə bağlı rəy bildirə bilər. Əgər valideynin iki övladı fərqli məktəblərdə təhsil alırsa, bu halda hər iki məktəb üzrə ayrıca rəy vermək imkanı təmin olunur.
Valideynlər sorğuda iştirak etmək üçün “Rəqəmsal məktəb” platformasında müvafiq keçid https://digital.edu.az/cabinet/survey.. vasitəsilə daxil ola bilərlər.
Vurğulanıb ki, sorğunun keçirilməsində əsas məqsəd ümumi təhsil müəssisələrinin fəaliyyətini qiymətləndirmək, məktəb–valideyn əməkdaşlığını inkişaf etdirmək, təhsil prosesinin daha səmərəli təşkilinə dəstək vermək, eləcə də effektiv kommunikasiya imkanlarını genişləndirməkdir.