Naxçıvan Dövlət Universiteti (NDU) ilə Azərbaycan Dövlət İqtisad Universiteti (UNEC) arasında əməkdaşlıq görüşü keçirilib.
Bu barədə "Tehsil365"ə universitetdən məlumat verilib. Bildirilib ki, NDU-nun konfrans zalında baş tutan tədbirdə universitetin rektoru Elbrus İsayev çıxış edərək ali təhsil müəssisəsinin tarixi, fəaliyyəti və inkişaf yolu haqqında ətraflı məlumat verib. Qeyd edib ki, 1967-ci ildə əsası qoyulan Naxçıvan Dövlət Universiteti uzun illərdir Naxçıvan Muxtar Respublikasının kadr potensialının formalaşmasına, sosial-iqtisadi inkişafına və ixtisaslı mütəxəssislərin hazırlanmasına mühüm töhfələr verir. Rektor NDU-nun elmi-tədqiqat, təlim-tədris və beynəlmiləlləşmə sahələrində əldə etdiyi nailiyyətlərdən danışaraq, 2025-ci ildə 252 nəfərin işə qəbulu ilə universitetin Naxçıvanda ən çox işəgötürən müəssisə olduğunu vurğulayıb.
UNEC-in rektoru Ədalət Muradov çıxışında görüşdən məmnunluğunu ifadə edib, rəhbərlik etdiyi ali təhsil müəssisəsinin fəaliyyəti və elmin inkişafı istiqamətində həyata keçirilən layihələr barədə məlumat verib. O, UNEC-in “Elmin populyarlaşdırılması” layihəsinin elmin cəlbediciliyinin artırılmasına və gənclərin elmə marağının gücləndirilməsinə xidmət etdiyini bildirib. Azərbaycan alimlərinin və onların əsərlərinin cəmiyyətə tanıdılmasının layihənin əsas məqsədlərindən biri olduğunu qeyd edən rektor NDU haqqında yüksək fikirlər səsləndirib: “Naxçıvan Dövlət Universiteti, həqiqətən də, böyük uğurlara imza atan universitetdir”.
Daha sonra Naxçıvan Dövlət Universiteti ilə Azərbaycan Dövlət İqtisad Universiteti arasında əməkdaşlıq memorandumu imzalanıb. Memorandumda hər iki universitetin elektron kitabxanalarının inteqrasiyası və ortaq elmi tədqiqatların aparılması nəzərdə tutulur. UNEC-in rektoru Ədalət Muradov kitabxanaların inteqrasiyasının ilk belə təşəbbüs olduğunu bildirərək, bu addımın universitetlər arasında elmi əməkdaşlığa ciddi töhfə verəcəyini vurğulayıb.
Tədbirdə iştirak edən ADPU-nun prorektoru, professor Mahirə Nağıqızı NDU-da olmaqdan məmnunluğunu ifadə edib, UNEC ilə NDU arasında imzalanan əməkdaşlıq müqaviləsini mühüm addım kimi dəyərləndirib. O, Prezident İlham Əliyevin Azərbaycan dilinin saflığının qorunması və dövlət dilinin təkmilləşdirilməsi ilə bağlı Fərmanına toxunaraq, ana dilimizin qorunması və milli-mənəvi dəyərlərin yaşadılmasının vacibliyini qeyd edib.
AMEA-nın həqiqi üzvü, akademik Muxtar İmanov isə çıxışında “Elmin populyarlaşdırılması” layihəsinin əhəmiyyətindən danışıb, elmin kütləviləşdirilməsində bu təşəbbüsün rolunu vurğulayıb, Azərbaycan dilinin qorunması məsələlərinə diqqət çəkib.
Görüşün sonunda tərəflər arasında xatirə hədiyyələri təqdim olunub və birgə foto çəkdirilib.
