Fevralın 5-də Azərbaycan Dillər Universitetində (ADU) Elmi Şuranın növbədənkənar iclası keçirilib.
Bu barədə “Tehsil365”ə universitetdən məlumat verilib. Bildirilib ki, iclasda ADU-nun rektoru, akademik Kamal Abdulla şura üzvlərini salamlayaraq gündəlikdə duran məsələlər barədə məlumat verib.
İclasda ADU rəhbərliyi və kollektivi Təhsil fakültəsinin dekanı, dosent Firuzə Rzayevanın elmlər doktoru elmi dərəcəsinə layiq görülməsi münasibətilə onu təbrik edib. Eyni zamanda Azərbaycan dilçiliyi kafedrasının müdiri Fərəh Niftəliyeva yubileyi münasibətilə təbrik olunub, hər iki əməkdaşa cansağlığı və gələcək fəaliyyətlərində uğurlar arzulanıb.
Rektor Kamal Abdulla çıxışında universitetin beynəlxalq əlaqələrinin inkişafı, keçirilən görüşlər və həyata keçirilən tədbirlər barədə məlumat verib. Qeyd olunub ki, ADU-da Özbəkistan Dövlət Cahan Dillər Universitetinin Özbək dili və ədəbiyyatı mərkəzinin açılışı baş tutub. Açılış mərasimində Özbəkistan Respublikasının Azərbaycandakı fövqəladə və səlahiyyətli səfiri Bahrom Aşrafxanov, Özbəkistan Dövlət Cahan Dillər Universitetinin rektoru, professor İlxomjon Tuxtasinov, Azərbaycan–Özbəkistan parlamentlərarası əlaqələr üzrə işçi qrupunun rəhbəri, millət vəkili Eldar İbrahimov və digər rəsmi şəxslər iştirak ediblər.
Eyni zamanda vurğulanıb ki, Azərbaycan Dillər Universiteti ilə Cənubi Koreyanın nüfuzlu ali təhsil müəssisələrindən biri olan Sunqşil Universiteti arasında Anlaşma Memorandumu imzalanıb. Son illər ADU ilə xarici ölkələrin universitetləri arasında elmi və mədəni əməkdaşlıq istiqamətində bir sıra tədbirlər həyata keçirilir. Bu əməkdaşlıq çərçivəsində akademik mübadilə, təcrübə və karyera imkanlarının araşdırılması, qarşılıqlı elmi konfransların təşkili, eləcə də dil və mədəniyyət mərkəzlərinin fəaliyyəti nəzərdə tutulur.
İclasda, həmçinin ADU-da Türkiyə Respublikasının “15 Temmuz Derneği” ictimai təşkilatının nümayəndə heyəti ilə keçirilən görüş də diqqətə çatdırılıb. Bildirilib ki, 80 ilə yaxın zəngin tarixə malik olan ADU ölkədə xarici dillər üzrə müəllim və mütəxəssis hazırlığında aparıcı ali təhsil müəssisələrindən biridir. Universitetdə ingilis, fransız, alman və türk dilləri ilə yanaşı, koreya, çin, indoneziya, özbək və digər nadir dillər də tədris olunur, müxtəlif dil və mədəniyyət mərkəzləri fəaliyyət göstərir.
ADU-nun Beynəlxalq əlaqələr üzrə prorektoru Jalə Qəribova çıxışında universitetin beynəlxalq əlaqələrinin genişləndiyini, bu istiqamətdə mühüm görüşlərin keçirildiyini bildirib. Türkiyənin Qazi Universiteti ilə ikili diplom layihəsi üzrə razılıq əldə olunduğu qeyd edilib. Bununla da ADU ikili diplom proqramlarının genişləndirilməsi istiqamətində növbəti uğura imza atıb.
Biliyin qiymətləndirilməsi şöbəsinin müdiri İranə Əsədzadə 2025/2026-cı tədris ilinin payız semestrinin qış imtahan sessiyasının yekunları barədə məlumat verib. Bildirilib ki, imtahanlar dörd növbədə təşkil olunub. Bakalavriat səviyyəsi üzrə imtahanlar saat 09:00–17:00, magistratura səviyyəsi üzrə isə saat 18:00–20:00 aralığında keçirilib və imtahanların təşkili yüksək səviyyədə təmin olunub.
Sessiyanın gedişinə operativ nəzarət və şəffaflığın təmin edilməsi məqsədilə İmtahan Qərargahı və Apelyasiya Komissiyası yaradılıb.
İclasın sonunda iştirakçılar universitetin akademik inkişafının davam etdirilməsi və gələcək əməkdaşlıq layihələrinin uğurla həyata keçirilməsi üçün birgə fəaliyyətin vacibliyini vurğulayıblar. Elmi Şuranın növbədənkənar iclası qəbul edilən qərarlar və fəal müzakirələrlə yekunlaşıb.