Hindistanlı müəllim, ictimai fəal, yüzlərlə tədris mərkəzinin yaradılması və kasıb məhəllələrinin divarlarında maarifləndirici freskaların çəkilməsi ilə tanınan Ruble Nagi “Varkey Foundation” təşkilatının təsis etdiyi 1 milyon dollar məbləğində “Global Teacher Prize” mükafatına layiq görülüb,
“Tehsil365" xəbər verir ki, dünyanın ən böyük mükafatlarından olan və müəllimliyin "Nobel"i adlandırılan "Dünya müəllim mükafatı" Ruble Nagiyə Dubayda (BƏƏ) keçirilən Ümumdünya Hökumətlər Sammitində təqdim olunub.
Rouble Naginin rəhbəri olduğu “Art Foundation” (RNAF) adlı bədii fond Hindistanın bütün ərazisi üzrə 800-dən çox tədris mərkəzi təsis edib. Bu mərkəzlərin məqsədi heç vaxt məktəbə getməmiş uşaqlara strukturlaşdırılmış təhsilə başlamaq imkanı yaratmaqdır. Bundan əlavə, R. Nagi savadlılıq, təbiət elmləri, riyaziyyat, tarix və digər fənləri öyrədən freskalar yaradır. O, Hindistanı gəzir və təlim mərkəzlərindəki uşaqlarla birbaşa işləyir, həmçinin bu mərkəzləri idarə edən müəllimlərə mentorluq edir. İndiyə qədər o, 600-dən çox könüllü və ödənişli müəllim işə götürüb və onlara təlim keçib.
R.Nagi öz təşəbbüsləri ilə təhsilə çıxışı təmin etmək üçün incəsənətdən bir vasitə kimi istifadə edir. Onun sinif otaqlarının çoxu çətin şəraitdə fəaliyyət göstərir, burada uşaqlar yoxsulluq, uşaq əməyi, erkən evlilik, nizamsız davamiyyət və əsas imkanların olmaması ilə üzləşirlər. Bunu həll etmək üçün R.Nagi uşaqlar üçün çevik cədvəllər, təkrar emal olunmuş materiallardan istifadə edərək praktik təlim və ailələrin faydalı hesab etdiyi bacarıq əsaslı dərslər tətbiq edib.
O, müəllimlik fəaliyyətinə 24 il əvvəl kiçik bir emalatxanada 30 şagirdlə başlayıb və hazırda bir milyondan çox uşaq təhsil prosesinə cəlb olunub. “Uşaq vaxtı arzum hər bir uşağın məktəbdə olmasını görmək idi və böyüyüb bu arzunu həyata keçirərək mümkün qədər çox uşağa kömək etmək çox təsirli bir təcrübədir”, – deyə o bildirib.
“Global Teacher Prize” mükafatının saytında yer alan bəyanatda deyilir: “Ruble Nagi müəllimlikdə ola biləcək ən yaxşı keyfiyyətləri təcəssüm etdirir: cəsarət, yaradıcılıq, mərhəmət və hər bir uşağın potensialına sarsılmaz inam”.
R.Nagi 1 milyon dolları pulsuz peşə təhsili təklif edəcək bir institutun tikintisinə sərf etməyi planlaşdırır.