Bakı Mühəndislik Universitetinin (BMU) Xarici dillər kafedrasının “MetaWay” təşkilatı ilə əməkdaşlığı çərçivəsində dilçilik mövzusunda onlayn vebinar təşkil olunub.
Tədbir akademik mübadilə, strukturlaşdırılmış elmi müzakirə və gələcək birgə tədqiqat əməkdaşlıqlarının təşviqi məqsədilə keçirilib. Beynəlxalq elmi platformada müxtəlif ölkələrdən tədqiqatçılar və mütəxəssislər iştirak ediblər.
BMU-dan “Tehsil365"ə bildirilib ki, vebinar çərçivəsində dilçilik və əlaqəli sahələr üzrə akademik məruzələr təqdim olunub. Çıxış edənlər öz elmi maraq dairələri, akademik profilləri və davam edən birgə tədqiqatları barədə məlumat veriblər. Məruzəçilər, həmçinin həmmüəllifli elmi nəşrlərin hazırlanmasına dair təkliflərini səsləndiriblər.
Vebinar səmərəli qarşılıqlı elmi əlaqənin genişlənməsinə və beynəlxalq tədqiqat şəbəkələrinin gücləndirilməsinə töhfə verib. Tədbirin akademik nəşrə dəstək tərəfdaşı “Linguiverse” beynəlxalq elmi jurnalı olub. “Linguiverse”, eyni zamanda, gələcək birgə tədqiqat nəticələrinin dərc olunması üçün potensial nəşr platforması kimi təqdim edilib.
Beynəlxalq əməkdaşlığın davamı olaraq gələcəkdə birgə akademik təşəbbüslərin və tədqiqat yönümlü tədbirlərin təşkili planlaşdırılır.