AMEA-nın Mərkəzi Elmi Kitabxanasında (MEK) “Korporativ elektron kitabxana sistemlərinin nəzəri əsasları” adlı yeni kitabın təqdimatı keçirilib.
MEK-dən “Tehsil365"ə bildirilib ki, nəşr bu kitabxananın direktoru texnika elmləri doktoru Hüseyn Hüseynovun, direktor müavini Oruc Quliyevin və baş mütəxəssis Azad Qurbanovun həmmüəllifliyi ilə ərsəyə gəlib. Layihənin rəhbəri AMEA-nın prezidenti akademik İsa Həbibbəylidir.
“Korporativ elektron kitabxana sistemlərinin nəzəri əsasları nəinki Azərbaycanda, ümumiyyətlə, postsovet məkanında ilk dəfə monoqrafik tədqiqata cəlb edilib. Biz bu mövzuya təsadüfi müraciət etməmişik. Müasir dövrdə kitabxana-informasiya sahəsində baş verən dərin və çoxsəviyyəli transformasiyalar açıq şəkildə göstərir ki, ənənəvi elektron kitabxana modelləri artıq mövcud reallıqları tam əhatə etmir və yeni elmi yanaşmalara ehtiyac yaranıb. Tədqiqatın aktuallığı, həmçinin rəqəmsal transformasiya şəraitində biliklərin idarə olunmasının səmərəliliyinə, korporativ yaddaşın dayanıqlılığına və informasiya resurslarının təşkilati fəaliyyətə inteqrasiyasına artan tələblərlə şərtlənir”, - deyə kitabxana rəhbəri qeyd edib.
Monoqrafiyanın giriş, yeddi fəsil və nəticə hissəsindən ibarət olduğunu diqqətə çatdıran H.Hüseynov kitabda 87 adda xarici nüfuzlu elmi nəşrlərə istinad edildiyini xüsusi vurğulayıb. O bildirib ki, MEK-də ötən ay əlçatanlığı təmin edilən 30 mindən artıq türkdilli nəşri və Türkiyənin 500-dən çox aparıcı nəşriyyatının elektron resurslarını özündə birləşdirən rəqəmsal Hiperkitap platformasında kitab artıq istifadəçilərə təqdim olunub.
“Biz göstərməyə çalışmışıq ki, korporativ elektron kitabxana sistemi yalnız texniki həllər toplusu deyil, eyni zamanda bilik idarəetmə alətidir. Monoqrafiyada kitabxana-informasiya sistemlərinin rəqəmsal transformasiya şəraitində keçdiyi inkişaf mərhələlərini ardıcıl şəkildə təhlil etmişik. Xüsusilə vurğulamışıq ki, müasir kitabxana artıq passiv informasiya anbarı rolundan çıxaraq aktiv bilik istehsalı, analitika və qərar dəstəyi mərkəzinə çevrilir. Bu dəyişikliklər korporativ yanaşmanın formalaşmasını zəruri edir” – bu sözləri isə kitabın həmmüəllifi Azad Qurbanov söyləyib.
Nəşrin elmi redaktoru Bakı Mühəndislik Universitetinin İnformasiya və kompüter texnologiyaları fakültəsinin dekanı texnika elmləri doktoru, professor Vaqif Qasımovdur. Onun sözlərinə görə, əsərdə kitabxanaların yeni formatda təkmilləşdirilməsi, korporativ elektron kitabxana sistemlərinin nəzəri əsasları və rəqəmsal transformasiya kontekstində kitabxana–informasiya sisteminin inkişaf mərhələləri əksini tapıb.
