Azərbaycan musiqi mədəniyyətinin tanınmış simalarından biri olan Əşrəf Cəlal oğlu Abbasov 23 mart 1920-ci ildə Şuşa şəhərində anadan olub.
"Tehsil365" xəbər verir ki, O, bəstəkar, musiqişünas və pedaqoq kimi çoxşaxəli fəaliyyəti ilə milli musiqi tarixində mühüm yer tutur.
Əşrəf Abbasov yaradıcılığı boyu klassik musiqi ənənələrini Azərbaycan xalq musiqisinin zəngin irsi ilə vəhdətdə təqdim etmiş, bir sıra dəyərli əsərlərə imza atmışdır. O, eyni zamanda pedaqoji fəaliyyəti ilə onlarla peşəkar musiqiçi nəslinin formalaşmasında mühüm rol oynamışdır. 1953–1957-ci illərdə Azərbaycan Dövlət Konservatoriyasının rektoru vəzifəsində çalışaraq ali musiqi təhsilinin inkişafına ciddi töhfələr vermişdir.
Onun xidmətləri dövlət tərəfindən yüksək qiymətləndirilmiş, 1963-cü ildə “Azərbaycan SSR əməkdar incəsənət xadimi”, 1990-cı ildə isə “Azərbaycan SSR xalq artisti” fəxri adlarına layiq görülmüşdür. Əşrəf Abbasov 1968-ci ildə professor elmi adını almışdır.
Görkəmli bəstəkar 8 fevral 1992-ci ildə Bakı şəhərində vəfat etmişdir. Əşrəf Abbasovun zəngin yaradıcılıq və elmi-pedaqoji irsi bu gün də Azərbaycan musiqi mədəniyyətinin inkişafında mühüm əhəmiyyət daşıyır.
Onun həyatı və fəaliyyəti milli musiqiyə xidmət nümunəsi kimi ehtiramla xatırlanır.