Şikar Qasımov 9 fevral 1958-ci ildə Laçın rayonunun Cicimli kəndində anadan olub. Orta təhsilini doğma kəndində və Güləbird kənd orta məktəbində başa vurduqdan sonra 1981-ci ildə Stepanakert Pedaqoji İnstitutunun Tarix fakültəsini fərqlənmə diplomu ilə bitirib. Əmək fəaliyyətinə tarix müəllimi kimi başlayan alim sonrakı illərdə elmi-pedaqoji və inzibati sahələrdə məsul vəzifələrdə çalışıb.
“Tehsil365” xəbər verir ki, 1987-ci ildən Azərbaycan Texniki Universitetində (keçmiş Politexnik İnstitutu) fəaliyyət göstərən Şikar Qasımov laborantlıqdan kafedra müdirliyinə, prorektorluq vəzifəsinədək yüksəlib. 1990-cı ildə namizədlik, 2008-ci ildə isə doktorluq dissertasiyasını müdafiə edərək tarix elmləri doktoru elmi dərəcəsi alıb. Uzun illər tarix və ictimai fənlərin tədrisi, elmi-tədqiqat işi və gənc kadrların hazırlanması ilə məşğul olub.
Professor Şikar Qasımov 330-dan çox elmi, metodik və publisistik məqalənin, bir sıra dərslik, dərs vəsaiti və monoqrafiyaların müəllifidir. Onun əsərləri Azərbaycanda olduğu kimi, xarici ölkələrin nüfuzlu elmi jurnallarında da dərc olunub. Alim beynəlxalq konfrans və simpoziumlarda Azərbaycan tarixini layiqincə təmsil edib.
İctimai-siyasi fəaliyyəti ilə də seçilən Şikar Qasımov Qarabağ müharibəsi veteranıdır. O, müxtəlif dövlət və ictimai mükafatlara, o cümlədən “Tərəqqi” medalına, “Fədai”, “Vətən naminə” medallarına və “Qabaqcıl Təhsil İşçisi” döş nişanına layiq görülüb.
Hazırda Azərbaycan Texniki Universitetində “İctimai fənlər” kafedrasının müdiri, Müharibə və Əmək Veteranları Şurasının sədri olan professor Şikar Qasımov elmi-pedaqoji və ictimai fəaliyyətini uğurla davam etdirir.