Baş ağrısı və əhval-ruhiyyənin pisləşməsi ilə bağlı narahatlıqlar son illər ictimaiyyətdə daha çox maqnit qasırğaları ilə əlaqələndirilir.
“Tehsil365” “Bizim.Media”-a istinadən xəbər verir ki, maqnit qasırğaları Yer kürəsinin maqnit sahəsinin normal tarazlıq vəziyyətindən müvəqqəti çıxması ilə xarakterizə olunan təbii proseslərdir. Bu hallar əsasən Günəşdə baş verən partlayışlar və kosmik hava hadisələri nəticəsində yaranır. Nəticədə Yerə çatan enerji axınları Yer kürəsinin maqnit balansına təsir göstərir və bu proses bir neçə saatdan bir neçə günə qədər davam edə bilər.
Son illər cəmiyyətdə formalaşmış yanaşmaya görə, baş ağrısı, halsızlıq və əhval-ruhiyyənin pisləşməsi halları birbaşa maqnit qasırğaları ilə əlaqələndirilir. Lakin mütəxəssislər bildirirlər ki, bu yanaşmanın elmi əsasları kifayət qədər güclü deyil.
Nevroloqların açıqlamalarına görə, indiyədək aparılan elmi tədqiqatlar maqnit qasırğaları ilə baş ağrıları arasında birbaşa səbəb-nəticə əlaqəsini təsdiqləmir. Genişmiqyaslı araşdırmalar geomaqnit aktivliyinin əksər insanlarda miqren və digər baş ağrılarına səbəb olmadığını göstərir.
Mütəxəssislər vurğulayırlar ki, baş ağrılarının əsas səbəbləri stress, yuxu pozğunluğu, yorğunluq, susuzluq və gündəlik həyat tərzi ilə bağlıdır. Psixoloqlar isə bu halların maqnit qasırğaları ilə əlaqələndirilməsini gözləmə effekti və psixoloji faktorlarla izah edirlər.