1–7 fevral tarixlərini əhatə edən 7 layihədən ibarət “Ən CAVAN Həftə” silsilə tədbirlər proqramı keçirilib.
"Tehsil365" xəbər verir ki, Azərbaycan Respublikasının Gənclər Fondunun dəstəyi, CAVAN Gənclər Hərəkatı İB-nin təşkilatçılığı ilə təşkil olunan 2 Fevral - Gənclər Gününə həsr olunmuş “Ən CAVAN Həftə” silsilə tədbirlər proqramına daxil olan, müxtəlif mövzuları əhatə edən qeyri-formal təhsilə fokuslanan vörkşoplar, elektron idman yarışlarına marağı olan iştirakçılar üçün esport turniri, yaradıcılıq və əyləncəni bir araya gətirən musiqi gecəsi, həyəcan dolu, rəngarəng rəqs yarışı, şəbəkələşmə görüşü gənclərin həm sosial, həm də peşəkar inkişafına töhfə verməklə yanaşı, onların istedadlarını nümayiş etdirmələri üçün də geniş imkanlar yaradıb.
Belə ki, 1 fevral tarixində start verilən həftənin ilk tədbiri “geek” mədəniyyətinin ayrılmaz hissəsi sayılan “K-pop üzrə vörkşop” olub. Rəqs Studiyasında keçirilən vörkşop zamanı gənclər rəqsin incəliklərini öyrənib. 2 fevral tarixində gənclərin yaradıcılıq potensialının artırılması məqsədilə baş tutan “CAVAN Acoustic Night" adlı musiqili gecə zamanı gənclər canlı ifaları dinləyib, səmimi atmosfer və unudulmaz anlar yaşayıb. Eyni zamanda silsilə tədbirlər çərçivəsində “FC26 Turniri”, “Buz arenasında şəbəkələşmə görüşü” , “Dulusçuluq üzrə vörkşop’’, “Hip-hop rəqs üzrə vörkşop” həyata keçirilib.
Layihənin bağlanış tədbiri isə “Ritmə Qarşı 2026 — Rəqs Müsabiqəsi’’-dir.
CAVAN Gənclər Hərəkatının icraçı direktoru Ənvər İsmayılzadə bildirib ki, Ən CAVAN Həftə silsilə tədbirlər proqramı sayəsində gənclərin zövqünə uyğun 7 fərqli layihə icra olunub. “Bu gün isə həftənin bağlanış tədbiri olan “Ritmə Qarşı 2026 — Rəqs Müsabiqəsi’’ baş tutub. Artıq 3-cü dəfədir ki, təşkil olunan bu müsabiqə gənclərin ən maraqla gözlədiyi tədbirlərdən biri olub. “All styles” formatında keçirilən müsabiqə 16–29 yaş arası rəqqasları bir səhnədə birləşdirib.
İştirakçılar fərdi üslub və texnikalarını nümayiş etdirərək münsiflərin və tamaşaçıların böyük marağına səbəb olublar. Ardıcıl baş tutan “battle”lar isə rəqabəti daha da gərgin və dinamik edib. Gələcək illərdə isə bu layihəni daha böyük konseptdə regionallarda və əsasən işğaldan azad edilmiş bölgələrdə Xankəndində, Şuşada keçirməyi nəzərdə tutmuşuq.
Müsabiqənin məqsədi yaradıcı gənclərin potensialının üzə çıxarılması və onların özünüifadə imkanlarının genişləndirilməsi, sağlam rəqabət mühitinin formalaşdırılması və rəqs mədəniyyətinin gənclər arasında təşviq edilməsidir’’.
Beləliklə, 7 gün fərqli gənc kütlələrə xitab edən “Ən CAVAN Həftə” öz işini uğurla yekunlaşdırıb.
