Naxçıvan Dövlət Universitetinin (NDU) Təbii Ehtiyatlar İnstitutunun “Hidrogeologiya və mineral sular” laboratoriyasının tədqiqat qrupu Almaniyanın Düsseldorf şəhərində doktorant, magistrant və bakalavrlar arasında keçirilən “BIO PRODUCTS” beynəlxalq müsabiqəsində I yerə layiq görülüb.
Bu barədə “Tehsil365”-ə Naxçıvan Dövlət Universitetindən məlumat verilib. Bildirilib ki, qrupun təqdim etdiyi 22 səhifəlik elmi layihə münsiflər heyəti tərəfindən yüksək qiymətləndirilib və I dərəcəli diplom, qızıl medal və “Grand Prix” kubokuna layiq görülüb.
Tədqiqat qrupuna laboratoriyanın müdiri, kimya üzrə fəlsəfə doktoru, dosent, Rusiya Təbiətşünaslıq Akademiyasının professoru Fizzə Məmmədova rəhbərlik edir. Elmi işçi, doktorant, dissertant və bakalavrlardan ibarət olan kollektiv fərdi elmi nailiyyətləri və peşə bacarıqlarını vahid istiqamətdə birləşdirərək müstəqil fəaliyyət göstərir.
Qeyd edək ki, qrupun əldə etdiyi uğur elmi mühitin gücləndirilməsi və tələbələrin tədqiqat bacarıqlarının inkişafı baxımından mühüm əhəmiyyət daşıyır.
