Bu gün görkəmli hərbi xadim, tam artilleriya generalı Səməd bəy Sadıq bəy oğlu Mehmandarovun vəfatından növbəti ildönümüdür.
"Tehsil365" xəbər verir ki,1855-ci il oktyabrın 16-da Lənkəranda anadan olan Səməd bəy Mehmandarov hərb sənətində yüksək peşəkarlığı və təşkilatçılıq bacarığı ilə seçilmişdir. O, Rusiya İmperator ordusunda xidmət edərək tam artilleriya generalı ali hərbi rütbəsinədək yüksəlmişdir.
1918-ci ildə Azərbaycan Xalq Cümhuriyyəti qurulduqdan sonra Səməd bəy Mehmandarov ölkənin hərbi quruculuğunda fəal iştirak etmiş, Azərbaycan Xalq Cümhuriyyəti Parlamentinin Müstəqillər fraksiyasının üzvü olmuşdur. O, Cümhuriyyət hökumətində Hərb naziri vəzifəsini icra edərək milli ordunun formalaşdırılması və möhkəmləndirilməsi istiqamətində mühüm addımlar atmışdır.
Sovet hakimiyyəti illərində də hərbi sahədə fəaliyyətini davam etdirən Mehmandarov Azərbaycan SSR və Sovet İttifaqı hərbi xadimi kimi xidmət göstərmişdir.
Səməd bəy Mehmandarov 1931-ci il fevralın 12-də Bakı şəhərində vəfat etmişdir. Onun zəngin və şərəfli ömür yolu Azərbaycan hərb tarixində xüsusi yer tutur və bu gün də ehtiramla yad edilir.