Azərbaycan təbii-coğrafi mövqeyi, zəngin iqlim müxtəlifliyi və mürəkkəb relyef quruluşu ilə dünyanın nadir biomüxtəliflik mərkəzlərindən biri hesab olunur. Qısa məsafədə yarımsəhra, meşə, dağ-çəmən, subalp və alp bitki qurşaqlarının bir-birini əvəz etməsi ölkə florasının zənginliyini daha da artırır. Azərbaycan florasında mövcud olan ali bitki növləri Qafqaz florasının böyük bir hissəsini təşkil edir. Azərbaycan florası hazırda sürətlə dəyişən təbii və antropogen təsirlər altındadır.
Bu barədə “Tehsil365” ə açıqlamasında Bakı Dövlət Universitetinin Botanika və bitki fiziologiyası kafedrasının müdiri professor Elşad Qurbanov məlumat verib. O qeyd edib ki, taksonomik dəqiqlik olmadan mühafizə tədbirlərinin düzgün qurulması mümkün deyil, monitorinq aparılmadıqda risklər gec aşkar olunur, rayonlar üzrə ekobotaniki təhlil həyata keçirilmədikdə isə planlaşdırma elmi əsasdan məhrum qalır. Bu baxımdan botaniki-coğrafi rayonlar üzrə bitkilərin taksonomiyasının öyrənilməsi, onların müasir vəziyyətinin qiymətləndirilməsi və monitorinqinin təşkili ölkənin ekoloji təhlükəsizliyi, iqtisadi dayanıqlılığı və təbii irsinin qorunması üçün aktual istiqamət kimi qiymətləndirilir.
“Son illərdə Azərbaycanda bu sahədə elmi-tədqiqat işləri intensivləşdirilib. Tədqiqatların əsas məqsədi ölkə florasının biomüxtəlifliyini sistemli şəkildə araşdırmaq, bitki örtüyünü ekobotaniki baxımdan təhlil etmək və ekoloji təhlükəsizlik sahəsində strateji qərarların qəbuluna elmi əsas formalaşdırmaqdan ibarətdir. Bakı Dövlət Universitetinin Botanika və bitki fiziologiyası kafedrasında da bu istiqamətdə iki müasir və aktual mövzu üzrə elmi-tədqiqat işləri həyata keçirilir. Aparılan digər elmi istiqamət isə müxtəlif stresli şəraitlərdə bitkilərin davamlılığının optimallaşdırılması, müasir texnologiyaların tətbiqi və biomüxtəlifliyin mühafizəsi ilə bağlıdır”,-deyə alim bildirib.