Ötən il respublikamızda fəaliyyət göstərən Heydər Əliyev mərkəzlərində 3500-ə yaxın tədbir təşkil edilib. Bu tədbirlərin 163 min iştirakçısı olub.
'“Tehsil365” xəbər verir ki, bu fikirləri Mədəniyyət üzrə Elmi-Metodiki və İxtisasartırma Mərkəzinin direktor müavini Seymur Hüseynov nazirliyin 2025-ci ildəki fəaliyyətinə həsr olunmuş kollegiya iclasında diqqətə çatdırıb.
Onun sözlərinə görə, əsas missiyası müasir Azərbaycan dövlətinin qurucusu, Ümummilli Lider Heydər Əliyevin siyasi irsinin araşdırılması və təbliği olan mərkəzlərdə hesabatlılıq tam şəkildə rəqəmsallaşdırılıb.
S.Hüseynov ötən il Heydər Əliyev mərkəzlərini 181 mindən çox qonaq ziyarət etdiyini bildirib.
Mərkəzlərin fondunda ümumilikdə 41 min 400-dən çox eksponat və 48 min 900-ə yaxın kitab mövcuddur. "Ulu Öndər Heydər Əliyevin adını daşıyan mərkəzlər artıq ideoloji-mədəni instituta çevrilib", - deyə direktor müavini əlavə edib.