“Hazırda humanitar fənlərin rolu yetərli səviyyədə deyil. Çox vaxt onlara ikinci dərəcəli fənlər kimi baxılır.”
Bu sözləri “Tehsil365”ə açıqlamasında təhsil eksperti Məzahir Məmmədli bildirib.
Ekspert qeyd edib ki, hazırda əsas diqqət riyaziyyat, texniki və peşəyönümlü sahələrə yönəldilir. Halbuki humanitar fənlər insanın düşüncəsini formalaşdırır, dəyərlərini artırır və dünyagörüşünü inkişaf etdirir.
“Humanitar fənləri yaxşı mənimsəyənlər tənqidi və analitik düşünmə bacarığını daha yaxşı inkişaf etdirirlər. İnsanın özünü ifadə etməsi üçün bu fənlərin rolu böyükdür”, – deyə o vurğulayıb.
Məzahir Məmmədli bildirib ki, son vaxtlar humanitar ixtisasların tədris müddətinin 4 ildən 3 ilə endirilməsi ilə bağlı fikirlər səsləndirilir. Onun sözlərinə görə, humanitar fənlər təhsil sisteminin əsas istiqaməti kimi qəbul olunmasa da, bu sahəyə lazımi yer ayrılmalıdır.
Ekspert sonda onu da əlavə edib ki, analitik düşüncənin və geniş dünyagörüşünün formalaşması üçün humanitar fənlərə kifayət qədər önəm verilməsi vacibdir.