Bakı Dövlət Universitetinin (BDU) “BDU könüllüləri” təşkilatının təşəbbüsü ilə fevralın 28-də Birinci Türkoloji Qurultayın 100 illik yubileyinə həsr olunmuş simulyasiya konfransı keçiriləcək.
BDU-dan “Tehsil365"ə bildirilib ki, Birinci Türkoloji Qurultay Türk dünyasının intellektual tarixində mühüm mərhələ olub. Simulyasiya konfransının keçirilməsində məqsəd türk xalqlarının dil, yazı və elmi-mədəni inkişafının müasir əsaslar üzərində yenidən qurulması ideyasına nəzər yetirmək, bu istiqamətdə müzakirələr aparmaqdır.
Konfrans çərçivəsində türk dillərinin elmi əsaslarının öyrənilməsi, qarşılıqlı anlaşmanın gücləndirilməsi və ortaq problemlərə vahid yanaşmanın formalaşdırılması müzakirə olunacaq. Konfrans ümumilikdə Türk dünyasının intellektual inteqrasiyası və modernləşməsi ideyasını əks etdirir.