Sumqayıt Dövlət Universitetində “Şəhərsalma və Memarlıq İli” çərçivəsində Həmkarlar İttifaqı Komitəsi və İdman Klubunun birgə təşkilatçılığı ilə voleybol yarışı keçirilib.
Bu barədə "Tehsil365"ə Sumqayıt Dövlət Universitetindən məlumat verilib. Bildirilib ki, universitetin və Sumqayıt Dövlət Texniki Kollecinin əməkdaşları arasında təşkil olunan turnir fevralın 11-dən start götürüb və iki gün davam edib.
Gərgin və maraqlı idman mübarizəsi şəraitində keçən yarışda hər biri 7 nəfərdən ibarət olmaqla ümumilikdə 6 komanda iştirak edib. Oyunlar zamanı komandalar yüksək əzmkarlıq, komanda ruhu və peşəkarlıq nümayiş etdiriblər.
Turnirin yekununda sabit və inamlı oyunu ilə seçilən Təbiət elmləri fakültəsinin komandası bütün rəqiblərini qabaqlayaraq birinci yerə layiq görülüb. Riyaziyyat fakültəsinin komandası ikinci, Filologiya fakültəsinin komandası isə üçüncü yeri tutub.
Qeyd olunub ki, yarışların təşkili universitet əməkdaşları arasında sağlam həyat tərzinin təbliği, kollektiv münasibətlərin möhkəmləndirilməsi və idman ənənələrinin inkişafı baxımından xüsusi əhəmiyyət kəsb edir.
