Fevralın 12-də Azərbaycan Dillər Universitetində (ADU) Rektoryanı şuranın növbəti iclası təşkil olunub. ADU-nun rektoru, akademik Kamal Abdulla şura üzvlərini salamlayaraq gündəlikdə duran məsələlər barədə məlumat verib.
Bu barədə "Tehsil365"ə ADU-dan məlumat verilib. Bildirilib ki, Azərbaycanın beynəlxalq uğurları və strateji tərəfdaşlıq imkanları artmaqdadır. Tarixdə ilk dəfə olaraq ABŞ-ın Vitse-prezidenti Cey Di. Vensin Azərbaycana rəsmi səfəri və səfər çərçivəsində keçirilmiş yüksək səviyyəli görüşlər iki ölkə arasında münasibətlərin inkişafında mühüm mərhələ kimi dəyərləndirilir. Rektor bildirib ki, bu səfər Azərbaycanın Prezidentinə və ölkəmizə olan münasibətin ifadəsidir və ölkəmizə yeni layihələrin həyata keçirilməsi üçün əlverişli imkanlar yaradır.
Daha sonra rektor müşaviri Coşqun Dadaşov universitetdə süni intellektdən istifadəyə dair görülən işlər barədə məlumat verib. Bildirilib ki, internet provayderlərinin iş imkanlarının yaxşılaşdırılması, universitetin elektronlaşdırılması, həm müəllimlərin, həm də tələbələrin tədris prosesinə daha uyğun qoşulması üçün tədbirlər görülüb. Eyni zamanda informasiya-kommunikasiya sahəsində imkanların artırılması və müasir tələblərə cavab verməsi istiqamətində işlər aparılır.
İnformasiya texnologiyaları kafedrasının müdiri, dosent Fikrət İbiyev süni intellekt sahəsində dövlət strategiyasına uyğun olaraq tədbirlərin mütəmadi keçirilməsinin vacibliyini vurğulayıb və kafedranın bu istiqamətdə aparıcı rol oynayacağını bildirib. Süni intellektlə idarə olunan təhsil sistemlərində ədalətlilik, şəffaflıq və hesabatlılığı təmin etmək məqsədilə tənzimləyici çərçivələrin formalaşmasının vacibliyi diqqətə çatdırılıb.
Elm və innovasiya məsələləri üzrə prorektor Həmidə Əliyeva çıxışında ADU-da keçirilmiş Süni İntellekt konfransından sonra Elm və Təhsil Nazirliyinə bu sahədə mərkəzin yaradılması ilə bağlı müraciətin olunduğunu qeyd edib. Həmçinin universitetdə süni intellektlə bağlı iclaslar keçirildiyi və elmi işlərin yoxlanılması istiqamətində işlərin aparıldığı bildirilib.
Daha sonra rektorun maliyyə məsələləri üzrə müşaviri Nüşabə Tanrıverdiyeva, Tədris işləri üzrə prorektor Şəfəq Şahməmmədova, ADU MHİK sədri Misgər Məmmədov və İKT şöbəsinin müdiri Azər Kərimov təkliflərlə çıxış edib, bu sahədə yaradılacaq yeni vəzifələrlə bağlı məlumat veriblər.
İclas müzakirələrlə davam edib.