Xəzər Universitetində 2026-cı il fevralın 4-də “Süni İntellektin (Sİ) real dünyaya təsiri” mövzusunda seminar təşkil olunub.
Bu barədə "Tehsil365"ə Xəzər Universitetindən məlumat verilib. Bildirilib ki, tədbiri dünya şöhrətli alim, Data Elmləri professoru Amir H. Gandomi aparıb.
Professor Gandomi seminar zamanı Sİ-nin real dünyada, xüsusilə kompüter elmləri sahəsində tətbiq imkanları barədə əhatəli məlumat verib. O, müasir Sİ yanaşmalarının mürəkkəb problemləri necə effektiv həll etdiyini izah edib və təkamül prinsiplərindən ilhamlanaraq yaradılmış qabaqcıl Sİ metodları sinfi olan Təkamül Keçirmiş Maşın İntellekti (EMI) barədə danışıb. Təqdimat genetik proqramlaşdırma, böyük verilənlərin təhlili, avtomatlaşdırılmış öyrənmə və mürəkkəb sistemlərin optimallaşdırılması kimi mövzuları əhatə edib.
Qeyd edək ki, Amir H. Gandomi Sidney Texnologiya Universitetinin Mühəndislik və İnformasiya Texnologiyaları fakültəsində Data Elmləri professorudur. O, 500-dən çox jurnalda məqalənin və 14 kitabın müəllifidir, işlərinə 77.000-dən çox istinad edilib (H-indeks: 119). Professor Gandomi ardıcıl altı il Web of Science tərəfindən “Çox İstinad Olunan Tədqiqatçı” seçilib və Süni İntellekt sahəsində ən nüfuzlu tədqiqatçılardan biri hesab edilir.
Seminarda Xəzər Universitetinin rəhbərliyi, akademik və inzibati heyət, eləcə də tələbələr iştirak edib. Tədbir interaktiv formatda keçirilib, bu da iştirakçılara müzakirələrdə aktiv iştirak etməyə və Sİ-nin aktual tendensiyaları və gələcək tədqiqat imkanları ilə bağlı suallarına ətraflı cavablar almağa imkan yaradıb.
Professor Gandomi kimi görkəmli beynəlxalq alimlərin qəbulu Xəzər Universitetinin akademik mühitinin inkişafına mühüm töhfə verir və universitetin beynəlxalq akademik əməkdaşlıqlarını gücləndirir.