Azərbaycanda ali təhsil alan tələbələrin əmək bazarına hazırlıq səviyyəsi ilə bağlı müzakirələr davam edir. Təhsil eksperti Ramin Nurəliyev mövzu ilə bağlı “Tehsil365”-ə açıqlama verib.
Ekspert bildirib ki, tələbələrin altı ay deyil, ən azı bir il müddətində təcrübə proqramlarında iştirak etməsi daha məqsədəuyğundur. Onun sözlərinə görə, universitetdə oxuyan tələbələr dövlət və özəl müəssisələrdə çalışaraq praktiki bilik və bacarıqlar əldə etməlidirlər. Çünki hazırda Azərbaycan universitetlərini bitirən məzunlar əmək bazarında ciddi çətinliklərlə üzləşirlər və işəgötürənlər onlardan xüsusi staj tələb edirlər. Staj olmadığı halda isə məzunların iş imkanları məhdudlaşır.
R.Nurəliyev qeyd edib ki, sonuncu kursun əvvəlindən etibarən tələbələr bir il müddətində, xüsusilə də praktiki sahələrdə fəaliyyət göstərməli, real iş mühitində təcrübə toplamalı və iş dünyasına inteqrasiyanı təmin etməlidirlər. O vurğulayıb ki, hazırda bir semestr davam edən təcrübə proqramı kifayət etmir.
Ekspertin fikrincə, universitetlərin həm dövlət, həm də özəl sektorla əməkdaşlığı genişləndirilməli, təcrübə keçiləcək müəssisələrin sayı artırılmalıdır. Bu yanaşma gələcəkdə gənclərin karyera imkanlarının genişlənməsinə şərait yarada bilər.
Ramin Nurəliyev əlavə edib ki, bu gün pedaqoji, mühasibatlıq, maliyyə və digər ixtisaslar üzrə məzun olan gənclər universiteti bitirdikdən sonra əlavə kurslara müraciət etməyə məcbur qalırlar. Bu isə ali təhsil müddətində praktiki biliklərin yetərincə formalaşdırılmadığını göstərir. Onun sözlərinə görə, tələbələr universiteti bitirərkən əmək bazarına hazır kadr kimi daxil olmalıdırlar.